— 15 —
Giuseppe äjedom oki nu su kiens omik bifü cödels e äsevokom ko vög yamik:
— Söls, diamin petifom ba, ab snek egivom omi obe; nim et uvilom cütön obi. I binos mögik das lep, lein e snek binoms dlimamags, ab yulob das esavob gabi Rinaldi. Nu no umo binom neledik e deilöl äslik äbinom, ven isavob omi se seb, e ven idilob bodi obik ko om, ab deno sevob omi legudiko. Ag, söl Rinaldi, äfovom man neläbik, no säkob nu matagivi e ledomi kelis epömetol obe, ab sagolös te vödi lebalik gönü ob! Viatolös das jedon obi in fanüb. Ag, labolös koliedi ko ob!
Baonel äblibom stonälik.
— Söls, äsagom sägo, kanob te denuön kelosi esagob ya; no sevob mani at, nevelo elogob omi. Edatikom jeni vemo drolik! Li-kanom blöfön velati vödas omik? Kiöp binoms noels oma?
Sosus vöds ab pisepükoms, älilon in sälun böseti gletik. Solats kels äjepoms feileli pöfik, ädlemoms de jek. Lep, lein e snek ämekoms nütlidi zelik in sälun. Lep ipladom oki su bäk leina, du snek isnekom zi nökeb lepa. Ven Rinaldi älogom nimis at äbeginom dlemön vemo.
— Ag, eko nims seba! äsevokom in lejek.
— Söl baonel, äsagom täno bisiedel fefiko, lenu äsäkol kiöp noels de Giuseppe äbinoms. No ezogoms lonedo kömön, e dub atos viatoms das kodemobs pösodi nedebik. Nedan ola lesinik popönom yed samiko. Ledom olik e gueds ola valik no umo olönoms ole e poninkikol dn lemän lifa olik in fanüb.
Lebegs do Rinaldi äbliboms nen sek, e pädukom foviko se sälun.
Täno cödel älenpükom feileli, kel älöfelom nimis, e äsagom ome:
— Bi baonel de Venezia eyulom, das ägivomöv ledomi ole o matagivi jigame olik, püblig de Ve-
