— 13 —
— Leno sevob mani et, ägepükom Rinaldi, vemo zunik, mosedolsöd omi.
Atos äjenos. Giuseppe älesagom vanliko das gab om it idalom ome kömön, dünels ämutoms omi mogolön.
No äkinom visitön nu jigami omik, e ägetävom pedevöl al ludom oma. Ab livemo äbinom pesüpitöl ven, ekömöl us, älogom nilü filöp lepi leini e sneki, kelis isavom se seb ävendelo. Ävilom fugön in jek gletik, ven süpito lein, muföl göbi dusiko, äkömom daifön nami omik, du lep ämekom logimis flenik e snek äsnekom da cem ko gälod gletikün. Giuseppe äbinom suno pestilöl. Nims pöfik at, äsagom oke, binoms ga gudikum ka gab Rinaldi, keli esavob äslik omis. Man nedanik emekom mosedön obi äsif äbinob-la lubegel. E ya äklödob getön matagivi lejönik plo Giulietta e zelön matedi obsik so gloliko! Nu labob sägo boadi nonik plo filöp, dili nonik mita al fidön e moni nonik al lemön omi.
So man pöfik äplonom. Täno lep änilom e ädukom omi al lemöd boada, pekumöl jöniko in smaspad cema. Nim ilasamom boadi at in fot e iblinom omi in ludom benodela omik. Lein ägluvokom dusiko e ädukom omi al smaspad votik cema, kiöp Giuseppe älogom stoki magifik foeta; äbinoms stägs tel, smastägs tel, svin e lievs mödik. Nu snek äkömom äl om, e Giuseppe älogom nidön in mud omik diamini gletik.
— Diamin! äsevokom Giuseppe, e äsumom nobastoni in nam. Ämilagom omi lonedo, du älöfelom lepi, leini e sneki kels ädlanoms okis zi om. Bi älabom nu boadi e foeti sätik, änedom te nog moni, e ko diamin omik äkanom getön omi nefikulo. Sikod ägolom al Venezia, äningolom in lemacem nobastonela e älofom ome diamini omik, kel äbinom de vat jönikün.
