13
Rèng-orèng sè paḍă nèngghoe, sè kabidhănna kettèr băn tako', satèja paḍă asorak ḍări bhoengana, nangalè kabettjè'anna Gulliver bhoeroe.
Bhǎreng ella lem-malem Gulliver mapana tèḍoeng, nangèng ta' nemmo lèntjak sè èkatèdoengana. Kangsè pa'bhellas arè abiddhă Gulliver sè tèḍoeng èpalèstèranna bengkona, alama' rebbhǎ kerrèng; sapo' sè sedḍheng radjăna ijă ta' nemmo. Molana Sang Rato ladjhoe aḍhăboe, adhika'aghi ngèbă băboet (1) karaton ḍoewă lambăr ḍǎ' bengkona Gulliver. Laèn ḍări djărèja aḍhăboe kèja aghăbăjjaghi lèntjak sè kennèng èkatèdoengè aba'na. Sakabbhiănna tokang è naghără djărèja paḍă èpalako aghăbăj katèḍoenganna Gulliver, sè radjana ra-kèra nem ratos kalè katèḍoenganna orèng Lillipoet. Bărijă kèja rateng kalabăn bhăntalla, kasor băn olessa bắn sapo'. Bhǎntalla ta' èkennèng èssè'è boeloena adjăm otabă mano', sabǎb è naghǎră Lillipoet taḍă' boeloe sabărijă bănnja'na, molana bhăntal bhoeroe èèssè'è boeloena embi'. Dhinèng kasorra èèssè'è rebbhǎ kerrèng. Sè maranta'a djărèja kabbhi, tanto ta' ghǎmpang tor kodhoe sabbhăr. Bhǎreng katèḍoenganna ella sekken, kowat èkatèḍoengè Gulliver, pas ètjatjak, kangsè doewǎ kalè sè rempa'. Nangèng ḍi-boeḍina ijă marè kèja sarta sekken. Sang Rato sabbhăn arè mondhoet reppot ollèna pangghăbăjăn; sarta raboe dhibi', anjata'aghi sekken ta' sekkenna lèntjak. È băkto djǎrèja Gulliver ngennèng ngatorè tarèma kasi ḍă' Sang Rato attas kabellăsanna.
Berta bhăb ḍătengnga raksasa Gulliver ella bălăttra è saantèro naghără. Molana lèr-kèlèran orèng sè ḍăteng, soghi, mèskèn, towa, ngoḍă, sè terro nèngghoeǎ bhoeta djărèja.
Bhăn-sabbhăn è karaton èbădă'aghi mosawaratan, èkapalaè Sang Rato dhibi', arembhǎk, èpabărămma'a Gulliver djărèja, sabab kabbhi ghi' padă tambhoeroeăn, amè' è sèttong băkto Gulliver mapegghǎ' rantajja, ladjhoe matè'è rèng-orèng Lillipoet. Bărijă kèja manorot panemmona Minister tanè, Gulliver tjè' bănnja'na pangakanna, mè’-amè' andhăddhiaghi laèppa saantèro naghără Lillipoet.
Bǎnnja' orèng panas atèna nangalè Gulliver sadjăn arè sadjăn èkaasè'è moso Sang Rato, bădă sè asaddjhă matèana sarana ratjon, băḍă sè anèjat ta' ngaterrana kakan, sopadjă Gulliver matèa salang lompo. Nangèng Sang Rato ta' mardoeli ḍă' kareppa bhăbăna sè mara djărèja, la-mala atambă asèna ḍă' Gulliver. Ḍări pangghăliănna Sang Rato mon Gulliver èratjona, djărèja dhoerăka; dhoesa patè rato taʼkosokan. Mon raksasa djărèja èpasalang lompoa, so'è ngabătèrè, sapa tao, bilă la talèbăt laparra amè' pas mapegghă' rantajja, ngamok otabă pas ararampas. Molana Sang Rato ladjhoe aparènta adjăgă bengkona Gulliver sopadjă taḍă'ă orèng aroe-biroe Gulliver djărèja; băn polè mon kangsè raksasa djărèja matè, boettjo'na bhădhănna tanto
(1) parangmadănè.
