KENEHI.
koe ona hua i roto i te mamae i nga ra katoa e ora ai koe;
18 He tataramoa ano hoki, he tumatakuru ana e whakatupu ake ai mau; a ka kai koe i te otaota o te parae;
19 Ma te werawera ano o tou mata e kai ai koe i te taro, a hoki noa koe ki te oneone; i tangohia mai nei hoki koe i reira: he puehu hoki koe, a ka hoki ano ki te puehu.
20 ¶ A i huaina e Arama te ingoa o tana wahine ko Iwi; no te mea ko te whaea ia o nga mea ora katoa.
21 Na, ka hangā e Ihowa e te Atua etahi kakahu hiako mo Arama raua ko tana wahine, a whakakakahuria ana raua.
22 ¶ Na, ka mea a Ihowa te Atua, Nana, kua rite nei te tangata ki tetahi o tatou, te mohio ki te pai ki te kino: na, kei totoro atu tona ringa aianei, kei tango i etahi o nga hua o te rakau o te ora, kei kai, a ka ora tonu:
23 Koia i tonoa atu ai ia e Ihowa e te Atua i te kari i Erene, hei ngaki i te oneone i tangohia mai nei ia i reira.
24 Heoi, peia ana e ia te tangata; a whakanohoia ana ki te taha ki te rawhiti o te kari o Erene etahi kerupima, me tetahi hoari mura, he mea piupiu tonu ki tetahi taha ki tetahi taha, hei tiaki i te huarahi ki te rakau o te ora.
UPOKO 4.
NA ka mohio a Arama ki a Iwi ki tana wahine; a ka hapu ia, a ka whanau a Kaina; na, ka mea ia, Kua whakawhiwhia mai ahau e Ihowa ki tetahi tangata.
2 Na, ka whanau ano tona teina a Apera. A he kai whangai hipi a Apera, ko Kaina ia he kai ngaki whenua.
3 A, i te mutunga o etahi rangi, na, ka kawea mai e Kaina etahi o nga hua o te whenua hei whakahere ki a Ihowa.
4 Me Apera hoki, i kawea mai ano e ia etahi o nga whanau matamua o tana kahui o o ratou ngako ano hoki. A ka aro mai a Ihowa ki a Apera me tana whakahere:
5 Kihai hoki i aro mai ki a Kaina me tana whakahere. A he nui rawa te riri a Kaina, a whakapoururu ana tona mata.
6 Na, ka mea mai a Ihowa ki a Kaina, Na te aha koe i riri ai? na te aha hoki i whakapoururu ai tou mata?
7 E kore ianei koe e kake ki te mahi koe i te pai? a ki te kahore koe e mahi i te pai, e takoto ana te hara i te kuwaha. Na, ka hiahia mai ia ki a koe, a ko koe hei rangatira mona.
8 Na, ka korero a Kaina ki a Apera ki tona teina: a i a raua i te parae, na, ka whakatika mai a Kaina ki a Apera ki tona teina, a patua iho.
9 ¶ Katahi ka mea mai a Ihowa ki a Kaina, Kei hea a Apera to teina? A ka mea atu ia, Kahore ahau e mohio: Ko ahau ianei te kai tiaki o toku teina?
10 Na, ka mea mai ia, He mahi aha tenei au? e tangi mai ana te reo o te toto o to teina ki a au i roto i te whenua.
11 Na, ka kangā koe i runga i te whenua, i hamama nei tona waha hei rerenga atu mo te toto o tou teina i whakahekea nei e tou ringa;
12 Ka ngakia e koe te oneone e kore e tukua mai tona kaha a muri ake nei ki a koe; ka waiho koe hei tangata haereere noa, hei manene i runga i te whenua.
13 Na, ka mea a Kaina ki a Ihowa, He nui toku kino, e kore e taea te muru.
14 Titiro hoki, ka peia nei ahau e koe inaianei i te mata o te whenua; a ka ngaro atu i tou kanohi; ka waiho ano hoki hei tangata haereere noa, hei manene i runga i te whenua; a tenei ake ki te tutaki tetahi tangata ki a au, na, ka patua ahau e ia.
15 Na, ka mea a Ihowa ki a ia, Na, ki te patu tetahi i a Kaina, e whitu nga utu e rapua i a ia. Na, ka homai e Ihowa he tohu ki a Kaina, kei patua ia e tetahi tangata ina tutaki ki a ia.
16 ¶ Na, ka haere atu a Kaina i te aroaro o Ihowa, a noho ana i te whenua o Noro, i te taha ki te rawhiti o Erene.
17 Na, ka mohio a Kaina ki tana wahine; a ka hapu ia, a ka whanau a Enoka: na, ka hanga ia i tetahi pa, a huaina iho te ingoa o te pa ko Enoka, ko te ingoa o tana tamaiti.
18 A whanau ake ta Enoka tama ko Irara: a whanau ake ta Irara ko Mehutaere: a whanau ake ta Mehutaere ko Metuhaere: a whanau ake ta Metuhaere ko Rameka.
19 Na, ka tangohia e Rameka etahi wahine tokorua mana: ko Araha te ingoa o tetahi, ko Tira hoki te ingoa o tetahi.
20 Na, ka whanau ta Araha tamaiti ko Iapara: ko te matua ia o te hunga noho teneti, ratou ko nga tangata whangai kararehe.
21 A ko Iupara te ingoa o tona teina: ko ia te matua o nga mea rahurahu ki te hāpa ki te okana.
22
Me Tira ano hoki, whanau ake tana ko Tupara-kaina, he kai whakaako ia no
