UPOKO 2, 3.
te pai ki te kino, kaua e kainga tetahi o ona hua; ta te mea hoki ko te ra e kai ai koe i tetahi o ona hua, ka mate koe, mate rawa.
18 ¶ Na, ka mea a Ihowa te Atua, E kore e pai kia noho te tangata ko ia anake; me hanga e ahau tetahi hoa pai mona.
19 Na, he mea whakaahua mai na Ihowa na te Atua i roto i te oneone nga kirehe katoa o te parae, me nga manu katoa o te rangi; a kawea mai ana e ia ki a Arama, kia kitea ai te ingoa e huaina e ia ki a ratou: a ko a Arama i hua ai ki nga mea ora katoa, hei ingoa ano era mo ratou.
20 Na, ka huaina e Arama he ingoa mo nga kararehe katoa, mo nga manu hoki o te rangi, mo nga kirehe katoa hoki o te parae; ko Arama ia kahore i kitea tetahi hoa pai mona.
21 Na, ka mea a Ihowa te Atua kia au iho te moe o Arama, a moe ana ia: na, ka tango ia i tetahi o ona rara, a tutakina atu ana te kikokiko hei whakakapi mo reira;
22 Na, ka hanga a Ihowa te Atua i te rara i tangohia e ia i roto i a Arama hei wahine, a kawea mai ana e ia ki a Arama.
23 A ka mea a Arama, Katahi ano ki tenei te wheua o roto o oku wheua, me te kikokiko o roto o oku kikokiko: me hua ia he Wahine, nona hoki i tangohia i roto i te Tangata.
24 No konei, ka whakarerea e te tangata tona papa me tona whaea, a ka piri ki tana wahine: a hei kikokiko kotahi raua.
25 A i te tu tahanga raua tokorua, te tangata me tana wahine, a kihai i whakama.
UPOKO 3.
NA, he mohio rawa te nakahi i nga kirehe katoa o te parae i hangā e Ihowa e te Atua. Na, ko tana meatanga mai ki te wahine, Koia, i mea mai ano te Atua, Kaua e kainga e korua nga hua o nga rakau katoa o te kari?
2 A ka mea atu te wahine ki te nakahi, E kai ano maua i nga hua o nga rakau o te kari:
3 Ko nga hua ia o te rakau i waenganui o te kari, kua mea mai te Atua, kaua korua e kai i tetahi o ona hua, kaua ano hoki e pa atu ki reira, kei mate korua.
4 Na, ko te meatanga mai a te nakahi ki te wahine, E kore korua e mate rawa:
5 Erangi e mohio ana te Atua ko te ra e kai ai korua i tetahi o ona hua, katahi ka mārama o korua kanohi, a ka whakaatua korua, ka mohio ki te pai ki te kino.
6 A, te kitenga o te wahine e pai ana te rakau hei kai, he ahuareka hoki ki te titiro atu, he rakau ano hoki e minaminatia hei whakamohio, na ka tango ia i etahi o ona hua, a ka kai, ka hoatu hoki ki tona tahu; a kai ana ia.
7 Na, ka mārama o raua kanohi, a ka mohio raua e tu tahanga ana raua; na, ka tuia e raua etahi rau piki, a meatia ana hei rapaki mo raua.
8 A ka rongo raua i te reo o Ihowa o te Atua e haereere ana i te kari i te hauhautanga o te ra: a ka piri a Arama raua ko tana wahine i te aroaro o Ihowa o te Atua ki roto ki nga rakau o te kari.
9 Na, ka karanga mai a Ihowa te Atua ki a Arama, ka mea ki a ia, Kei hea koe?
10 A ka mea atu ia, I rongo ahau ki tou reo i te kari, a wehi ana ahau, noku i tu tahanga; na, piri ana ahau.
11 Na, ka mea mai ia, Na wai i mea ki a koe e tu tahanga ana koe? Kua kainga ranei e koe etahi o nga hua o te rakau i kiia atu e ahau ki a koe, Kaua ona hua e kainga?
12 Na, ka mea te tangata, Na te wahine i homai nei e koe hei hoa moku, nana i homai etahi o nga hua o te rakau ki a au, a kainga ana e ahau.
13 Na, ka mea mai a Ihowa te Atua ki te wahine, He aha tenei kua meatia nei e koe? A ka mea atu te wahine, Na te nakahi ahau i maminga, a kai ana ahau.
14 Na, ka mea a Ihowa te Atua ki te nakahi, Mo tenei mahi au, nui atu te kanga mou i o nga kararehe katoa, i o nga kirehe katoa o te parae; ko tou kopu hei haere mou, a ko te puehu hei kai mau i nga ra katoa e ora ai koe:
15 A ka whakatupuria e ahau he pakanga ma korua ko te wahine, ma tou uri ratou ko tona uri; ka maru tou mātenga i a ia, a ka maru i a koe tona rekereke.
16 Ka mea ia ki te wahine, Ka whakanuia rawatia e ahau tou mamae, me tou haputanga; ka mamae koe ina whanau tamariki; a ka hiahia koe ki tou tahu, ko ia ano hoki hei rangatira mou.
17
A, ka mea ia ki a Arama, Mo to rongonga ki te reo o to wahine, mo to kainga hoki i te hua o te rakau i kiia atu e ahau ki a koe, i meatia atu, Kaua e kainga etahi o ona hua: ka oti te oneone te kanga mo to mahi; kaka inga e
B 2
