KENEHI.
22 Na, ka manaaki te Atua i a ratou, ka mea, Kia hua koutou, kia tini, kia kapi hoki nga wai o nga moana i a koutou, kia tini ano hoki nga manu ki runga ki te whenua.
23 A ko te ahiahi raua ko te ata te ra tuarima.
24 ¶ Na, ka mea te Atua, Kia whakaputaina ake e te whenua te mea ora o ia ahua o ia ahua, te kararehe, me te mea ngokingoki, me te kirehe o te whenua, o ia ahua o ia ahua: a ka oti.
25 Na, ka hangā e te Atua te kirehe o te whenua o ia ahua o ia ahua, me te kararehe o ia ahua o ia ahua, me nga mea ngokingoki katoa o te whenua o ia ahua o ia ahua: a ka kite mai te Atua, e pai ana.
26 ¶ Na, ka mea te Atua, Kia hanga tatou i te tangata kia rite ki a tatou, hei to tatou hoki te ahua: a kia waiho ratou hei rangatira mo nga ika o te moana, mo te manu hoki o te rangi, mo nga kararehe hoki, mo te whenua katoa hoki, mo nga mea ngokingoki katoa ano hoki e ngokingoki ana i runga i te whenua.
27 Na, ka hangā e te Atua te tangata, he mea rite ki a ia, i hangā ia e ia kia rite ki te Atua; i hangā raua he tane he wahine.
28 Na, ka manaakitia raua e te Atua, a ka mea te Atua ki a raua, Kia hua, kia tini, kia kapi hoki te whenua, i a korua, kia mate hoki ona tara i a korua: a hei rangatira ano korua mo te ika o te moana, mo te manu hoki o te rangi, mo nga mea ora katoa hoki e ngokingoki ana i runga i te whenua.
29 ¶ Na, ka mea mai te Atua, Na, kua oti nei te hoatu e ahau ki a korua nga otaota katoa e whai purapura ana i runga i te mata o te whenua katoa, me te rakau katoa, he hua rakau tona e whai purapura ana; hei kai ena ma korua.
30 Me nga otaota matomato katoa, hei kai ma nga kararehe katoa o te whenua, ma nga manu katoa hoki o te rangi, ma nga mea katoa hoki e ngokingoki ana i runga i te whenua kei roto nei i a ratou he wairua ora: a ka oti.
31 A, ka kite te Atua i nga mea katoa kua hangā, nei e ia, na, pai whakaharahara. A ko te ahiahi raua ko te ata te ra tuaono.
UPOKO 2.
NA, ka oti nga rangi me te whenua, me o reira mano katoa.
2 A no te whitu o nga ra i oti ai i te Atua tana mahi i mahi ai; na, ka okioki ia i te ra whitu i ana mahi katoa i mahia e ia.
3 Na, ka whakapaingia e te Atua te ra whitu, a whakatapua ana e ia: mona i okioki i reira i ana mahi katoa i oti i te Atua te hanga.
4 ¶ Ko nga whakatupuranga enei o nga rangi, o te whenua i te hanganga ai, i te ra i hangā ai e Ihowa e te Atua te whenua me nga rangi.
5 O nga mea katoa ano hoki e tupu ana i te oneone i te mea kahore ano aua mea i te whenua, o nga otaota katoa ano hoki o te oneone i te mea kahore ano kia pihi noa: kahore nei hoki a Ihowa te Atua i mea noa kia ua ki runga ki te whenua, a kahore he tangata hei mahi i te oneone.
6 Engari i pupu ake he kohu i te whenua, a nana i whakamakuku te mata katoa o te oneone.
7 Na, ka whakaahuatia te tangata e Ihowa e te Atua, he puehu no te oneone, a whakahangia ana e ia ki roto ki ona pongaihu te manawa ora; a ka whakawairua ora te tangata.
8 ¶ Na, ka whakatokia e Ihowa e te Atua tetahi kari ki Erene ki te taha ki te rawhiti; a whakanohoia iho ki reira te tangata i hangā e ia.
9 A i whakatupuria ake ano e Ihowa e te Atua i roto i te oneone nga rakau katoa e ahuareka ana ki te titiro, e pai ana hoki hei kai, me te rakau ano o te ora i waenganui o te kari, raua ko te rakau o te matauranga ki te pai ki te kino.
10 A i rere mai ano he awa i Erene hei whakamakuku i te kari; a marara ake i reira e wha nga tino awa.
11 Ko Pihona te ingoa o te tuatahi; tera hoki e taiawhio i te whenua katoa o Hawira, he koura hoki kei reira;
12 A he pai te koura o taua whenua: kei reira te teriuma me te kohatu onika.
13 A te ingoa o te rua o nga awa ko Kihona: ko ia tera e taiawhio i te whenua katoa o Etiopia.
14 A te ingoa o te toru o nga awa ko Hirekere; tera hoki e rere whaka-te-rawhiti o Ahiria. A ko Uparati te wha o nga awa.
15 Na, ka tango a Ihowa te Atua i te tangata, a whakanohoia ana e ia ki te kari o Erene, hei ngaki, hei tiaki hoki i reira.
16 Na ka ako mai a Ihowa te Atua ki te tangata, ka mea, Kainga noatia nga hua o nga rakau katoa o te kari:
17
Ko te rakau ia o te matauranga ki
2
