ꦫꦺꦝꦠꦼꦁꦥꦁꦒꦺꦤ꧀ꦤꦤ꧀ꦥꦁꦒꦺꦤ꧀ꦤꦤ꧀ꦱꦗꦮꦶꦤꦶꦁꦏꦶꦛꦲꦶꦁꦏꦁꦱꦲꦺꦲꦮꦤꦶꦥꦸꦤ꧀꧉
꧋ꦱꦫꦺꦃꦤꦶꦁꦥꦏꦼꦩ꧀ꦥꦭ꧀ꦭꦤ꧀ Ons huis ꦲꦶꦁꦤꦒꦫꦶꦮꦭꦤ꧀ꦢꦶꦥꦸꦤꦶꦏꦠꦼꦠꦺꦭꦩꦸꦫꦏꦧ꧀ꦧꦶꦱꦔꦼꦠ꧀ꦝꦠꦼꦁꦏꦱꦫꦱ꧀ꦱꦤ꧀ꦤꦶꦁꦭꦫꦺ꧈ꦥꦿꦩꦶꦭꦲꦶꦁꦠꦤꦃꦲꦶꦤ꧀ꦢꦶꦪꦔꦿꦶꦏꦶꦲꦸꦒꦶꦮꦺꦴꦤ꧀ꦠꦼꦤ꧀ꦥꦏꦼꦩ꧀ꦥꦭ꧀ꦭꦤ꧀ꦥꦏꦼꦩ꧀ꦥꦭ꧀ꦭꦤ꧀ꦲꦶꦁꦏꦁꦢꦶꦥꦸꦤ꧀ꦤꦩꦑꦏꦼꦤ꧀꧇ Kindervacantie Kolonie ꦲꦶꦁꦯꦭꦠꦶꦒꦠꦸꦮꦶꦤ꧀ꦲꦶꦁꦯꦸꦏꦧꦸꦩꦶ꧉ꦢꦺꦤꦺꦭꦫꦺꦭꦫꦺꦲꦶꦁꦏꦁꦱꦩꦶꦢꦶꦥꦸꦤ꧀ꦧꦸꦢꦶꦢꦪꦢꦺꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦥꦏꦼꦩ꧀ꦥꦭ꧀ꦭꦤ꧀ꦮꦲꦸ꧈ꦲꦶꦁꦱꦏꦮꦶꦠ꧀ꦤꦩꦸꦁꦠꦸꦩꦿꦥ꧀ꦭꦫꦺꦲꦤꦏ꧀ꦏꦶꦥꦸꦤ꧀ꦠꦶꦪꦁꦩꦶꦱ꧀ꦏꦶꦤ꧀꧈ꦢꦔꦸꦢꦔꦸꦥꦫꦲꦤꦏ꧀ꦏꦶꦥꦸꦤ꧀ꦠꦶꦪꦁꦲꦶꦁꦏꦁꦏꦕꦼꦏꦥ꧀ꦥꦤ꧀ꦲꦶꦁꦒꦶꦃꦢꦶꦥꦸꦤ꧀ꦠꦸꦩꦸꦠ꧀ꦠꦏꦼꦤ꧀ꦝꦠꦼꦁꦥꦏꦼꦩ꧀ꦥꦭ꧀ꦭꦤ꧀ꦮꦲꦸ꧈ꦤꦔꦶꦁꦩꦮꦶꦲꦸꦫꦸꦤ꧀ꦲꦂꦠꦱꦏꦢꦂꦫꦶꦥꦸꦤ꧀꧉ꦮꦶꦮꦶꦠ꧀ꦠꦤ꧀ꦤꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ Kindervacantie Kolonie ꦥꦸꦤꦶꦏꦤꦩꦸꦁꦲꦚꦝꦶꦪꦤ꧀ꦤꦶꦭꦫꦺꦭꦫꦺꦧꦺꦴꦁꦱꦌꦫꦺꦴꦥꦃꦏꦺꦩꦮꦺꦴꦤ꧀꧈ꦏꦧꦂꦫꦶꦥꦸꦤ꧀ꦱꦩꦁꦏꦺꦥꦏꦼꦩ꧀ꦥꦭ꧀ꦭꦤ꧀ Kindervacantie Kolonie ꦲꦶꦁꦯꦸꦏꦧꦸꦩꦶꦱꦸꦩꦼꦢꦾꦚꦸꦮꦸꦤ꧀ꦱꦸꦧ꧀ꦱꦶꦝꦶꦝꦠꦼꦁꦤꦒꦫꦶ꧈ꦱꦲꦱꦭꦗꦼꦁꦔꦶꦥꦸꦤ꧀ꦧꦝꦺꦤꦩ꧀ꦥꦺꦤ꧀ꦤꦶꦭꦫꦺꦭꦫꦺꦲꦤꦏ꧀ꦏꦶꦥꦸꦤ꧀ꦱꦝꦺꦔꦃꦧꦺꦴꦁꦱ꧈(ꦢꦢꦺꦴꦱ꧀ꦲꦶꦁꦠꦼꦩ꧀ꦧꦺꦥꦏꦼꦩ꧀ꦥꦭ꧀ꦭꦤ꧀ Kindervacantie Kolonie ꦧꦺꦴꦠꦼꦤ꧀ꦔꦼꦩꦸꦁꦔꦏꦼꦤ꧀ꦧꦸꦢꦶꦢꦪꦝꦠꦼꦁꦏꦱꦫꦱ꧀ꦱꦤ꧀ꦤꦶꦁꦭꦫꦺꦭꦫꦺꦌꦫꦺꦴꦥꦃꦏꦺꦩꦮꦺꦴꦤ꧀꧈ꦲꦤꦔꦶꦁꦲꦸꦒꦶꦭꦫꦺꦭꦫꦺꦥꦿꦶꦧꦸꦩꦶ꧈ꦭꦸꦩꦪꦤ꧀)꧉
꧋ꦤꦶꦠꦶꦏ꧀ꦒꦼꦁꦔꦶꦁꦏꦥꦽꦭꦸꦮꦤ꧀ꦲꦶꦁꦏꦁꦱꦩ꧀ꦥꦸꦤ꧀ꦏꦱꦠ꧀ꦩꦠꦥꦸꦤꦶꦏ꧈ꦥꦸꦤꦥꦧꦺꦴꦠꦼꦤ꧀ꦭꦁꦏꦸꦁꦲꦸꦠꦩꦶ꧈ꦱꦲꦸꦥꦩꦶꦧꦺꦴꦁꦱꦏꦸꦭꦗꦮꦶꦥꦶꦪꦩ꧀ꦧꦏ꧀꧈ꦏꦼꦂꦱꦠꦶꦫꦸꦠꦶꦫꦸꦲꦔꦢꦤ꧀ꦤꦶꦧꦸꦢꦶꦢꦪꦲꦶꦁꦏꦁꦱꦏ꧀ꦭꦁꦏꦸꦁꦲꦩꦸꦫꦏꦧ꧀ꦧꦶꦝꦠꦼꦁꦏꦩꦗꦼꦁꦔꦤ꧀ꦤꦶꦁꦭꦫꦺꦥꦸꦤꦶꦏ꧉
꧋ꦭꦫꦺꦭꦫꦺꦱꦩꦶꦲꦚꦼꦚꦼꦤꦼꦁꦩꦤꦃꦲꦶꦥꦸꦤ꧀ꦥꦫꦤꦤꦸꦩ꧀ꦥꦏ꧀ꦲꦺꦒꦿꦁ꧉
꧋ꦧꦺꦴꦠꦼꦤ꧀ꦭꦁꦏꦸꦁꦏꦗꦮꦺꦤ꧀ꦠꦤ꧀ꦱꦃꦲꦤ꧀ꦢꦼꦢꦺꦴꦔ꧈ꦩꦸꦒꦶꦩꦸꦒꦶꦮꦺꦴꦤ꧀ꦠꦼꦤ꧀ꦤꦏꦠꦂꦧꦸꦏꦤ꧀ꦤꦶꦁꦥꦁꦒꦭꦶꦃꦲꦶꦥꦸꦤ꧀ꦥꦫꦥꦤꦸꦤ꧀ꦠꦸꦤ꧀ꦤꦶꦁꦥꦏꦼꦩ꧀ꦥꦭ꧀ꦭꦤ꧀ꦥꦏꦼꦩ꧀ꦥꦭ꧀ꦭꦤ꧀ꦲꦶꦁꦏꦁꦱꦩꦶꦔꦸꦢꦶꦝꦠꦼꦁꦏꦩꦗꦼꦁꦔꦤ꧀ꦤꦶꦁꦠꦤꦃꦗꦮꦶꦱꦲꦠꦶꦠꦶꦪꦁꦔꦶꦥꦸꦤ꧀꧈ꦏꦢꦺꦴꦱ꧀ꦠ꧇ꦥꦏꦼꦩ꧀ꦥꦭꦤ꧀ꦩꦸꦃꦲꦩꦢ꧀ꦢꦶꦪꦃ꧈ꦥꦂꦠꦺꦯꦫꦺꦏꦠ꧀ꦆꦱ꧀ꦭꦩ꧀꧈ꦨꦸꦢꦶꦲꦸꦠꦩ꧈ꦠꦩꦤ꧀ꦱꦶꦱ꧀ꦮ꧈ꦲꦂꦗꦸꦟ*ꦯꦼꦏ꦳ꦭ꧀꧈ꦭꦤ꧀ꦱꦱꦩꦶꦤꦶꦥꦸꦤ꧀꧈ꦏꦂꦱꦲꦭꦗꦼꦁꦕꦚ꧀ꦕꦸꦠ꧀ꦲꦠꦭꦶꦮꦤ꧀ꦢ꧈ꦲꦔꦢꦤ꧀ꦤꦶꦲꦢꦼꦒ꧀ꦒꦶꦥꦸꦤ꧀ꦥꦏꦼꦩ꧀ꦥꦭ꧀ꦭꦤ꧀ꦲꦶꦁꦏꦁꦩꦏꦠꦼꦤ꧀ꦮꦲꦸ꧉
