꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦠꦸꦮꦤ꧀ Steinmetz ꦠꦶꦭꦱ꧀ꦉꦱꦶꦝꦺꦤ꧀ꦱꦼꦢ꧉ꦲꦱ꧀ꦩꦤꦶꦥꦸꦤ꧀ꦲꦶꦁꦏꦁꦤꦼꦩ꧀ꦧꦼꦱꦸꦮꦂꦒꦶꦮꦲꦸꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦲꦶꦁꦠꦤꦃꦆꦤ꧀ꦝꦶꦪꦢꦶꦥꦸꦤ꧀ꦱꦸꦩꦼꦉꦥ꧀ꦥꦶꦲꦶꦁꦠꦶꦠꦶꦪꦁꦏꦛꦃ꧈ꦥꦸꦤꦥꦩꦭꦶꦃꦱꦏꦶꦁꦧꦧ꧀ꦠꦶꦤ꧀ꦢꦏ꧀ꦉꦏꦢꦪꦤꦶꦥꦸꦤ꧀ꦝꦠꦼꦁ Mindere Welvaart꧉ꦩꦶꦭꦮꦂꦠꦺꦴꦱ꧀ꦲꦶꦁꦧꦧ꧀ꦱꦼꦢꦤꦶꦥꦸꦤ꧀ꦠꦸꦮꦤ꧀ Steinmetz ꦮꦲꦸ꧈ꦲꦢꦩꦼꦭ꧀ꦏꦫꦲꦺꦴꦱ꧀ꦱꦶꦁꦩꦤꦃꦲꦶꦥꦸꦤ꧀ꦠꦶꦠꦶꦪꦁꦲꦶꦁꦆꦤ꧀ꦝꦶꦪ꧉
꧋ꦲꦶꦁꦏꦩ꧀ꦥꦸꦁꦡꦭꦁ꧈ꦧꦮꦃꦦꦪꦏꦺꦴꦩ꧀ꦧꦺꦴ꧈ꦯꦸꦩꦠꦿ꧈ꦮꦺꦴꦤ꧀ꦠꦼꦤ꧀ꦒꦺꦴꦭꦺꦴꦁꦔꦤ꧀ꦏꦺꦴꦩ꧀ꦩꦸꦤꦶꦱ꧀ꦲꦶꦁꦏꦁꦱꦮꦼꦒ꧀ꦥꦉꦥꦠ꧀ꦠꦤ꧀ꦏꦒꦿꦺꦴꦥꦾꦺꦴꦏ꧀ꦲꦶꦁꦥꦸꦭꦶꦱꦶ꧈ꦧꦼꦁꦒꦺꦴꦭ꧀ꦭꦶꦥꦸꦤ꧀ꦤꦩꦝꦠꦸꦏ꧀ꦩꦔ꧀ꦒꦸꦁꦮꦤꦶꦔ꧀ꦭꦮꦤ꧀꧈ꦤꦔꦶꦁꦲꦸꦒꦶꦏꦼꦕꦼꦥꦼꦁ꧉
꧋ꦥꦫꦥꦸꦁꦒꦮꦥꦩꦼꦭꦶꦏ꧀ꦏꦤ꧀ꦠꦶꦩꦃꦲꦶꦁꦨꦁꦏꦃ꧈ꦱꦩꦶꦧꦺꦴꦠꦼꦤ꧀ꦤꦫꦶꦩꦃꦗꦭꦂꦫꦤ꧀ꦧꦭꦚ꧀ꦗꦤꦶꦥꦸꦤ꧀ꦢꦶꦥꦸꦤ꧀ꦱꦸꦢ 5%꧈ꦩꦺꦴꦁꦏꦚꦠꦤꦶꦥꦸꦤ꧀ꦱꦩꦸꦏꦮꦶꦱ꧀ꦏꦧꦼꦠꦃꦲꦤ꧀ꦤꦶꦁꦠꦶꦪꦁꦧꦊꦒꦿꦶꦪꦠꦏ꧀ꦱꦶꦃꦱꦂꦮꦲꦮꦶꦱ꧀꧉
꧋ꦏꦭꦠꦁꦒꦭ꧀ꦏꦥꦶꦁ 15 ꦮꦸꦭꦤ꧀ꦥꦸꦤꦶꦏ꧈ꦲꦶꦁꦥꦩꦸꦭꦁꦔꦤ꧀ꦲꦂꦗꦸꦤꦨꦚ꧀ꦗꦂꦤꦒꦫꦏꦁꦒꦼꦥꦥꦤ꧀ꦥꦏꦼꦩ꧀ꦥꦭ꧀ꦭꦤ꧀ꦤꦶꦥꦸꦤ꧀ꦥꦫꦮꦤꦶꦠ꧈ꦤꦼꦢꦾꦔꦼꦢꦼꦒ꧀ꦒꦏꦼꦤ꧀ꦥꦏꦼꦩ꧀ꦥꦭ꧀ꦭꦤ꧀ꦤꦩꦮꦤꦶꦠꦏꦚ꧀ꦕꦤ꧈ꦩꦶꦫꦶꦢ꧀ꦱꦏꦶꦁꦲꦢꦼꦒ꧀ꦒꦶꦁꦥꦏꦼꦩ꧀ꦥꦭ꧀ꦭꦤ꧀ꦮꦲꦸꦮꦺꦴꦤ꧀ꦠꦼꦤ꧀ꦲꦶꦁꦧꦮꦃꦨꦚꦸꦩꦱ꧀꧉ꦲꦶꦁꦏꦁꦔꦿꦮꦸꦃꦲꦶꦥꦫꦥꦸꦠꦿꦶꦮꦺꦴꦤ꧀ꦠꦼꦤ꧀ 60꧈ꦥꦩꦼꦝꦂꦱꦧ꧀ꦢ Juff. ꦯꦶꦠꦶꦱꦸꦲꦂꦠꦶ꧈ꦒꦸꦫꦸꦥꦩꦸꦭꦁꦔꦤ꧀ꦲꦂꦗꦸꦤ꧈ꦥꦏꦼꦩ꧀ꦥꦭ꧀ꦭꦤ꧀ꦏꦭꦩ꧀ꦥꦃꦲꦤ꧀ꦔꦢꦼꦒ꧀꧈ꦲꦶꦁꦏꦁꦢꦢꦺꦴꦱ꧀ꦲꦚ꧀ꦕꦱ꧀ꦱꦶꦥꦸꦤ꧀ꦧꦝꦼꦔꦗꦼꦁꦔꦏꦼꦤ꧀ꦏꦒꦸꦤꦤ꧀ꦮꦤꦶꦠ꧉
꧋ꦱꦥꦸꦤꦶꦏꦮꦺꦴꦤ꧀ꦠꦼꦤ꧀ꦮꦂꦠꦺꦴꦱ꧀ꦩꦭꦶꦃꦱꦒꦼꦢ꧀ꦲꦸꦒꦶ De Jeer ꦲꦶꦁꦏꦁꦱꦩ꧀ꦥꦸꦤ꧀ꦏꦮꦂꦠꦺꦴꦱ꧀ꦱꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦏꦗꦮꦺꦤ꧀꧈ꦧꦝꦼꦏꦥꦿꦶꦏ꧀ꦱꦥꦿꦏꦮꦶꦱ꧀ꦱꦶꦥꦸꦤ꧀꧈ꦲꦶꦁꦧꦧ꧀ꦒꦒꦪꦸꦠ꧀ꦠꦤ꧀ꦤꦶꦥꦸꦤ꧀ꦏꦭꦶꦪꦤ꧀ꦧꦼꦫꦺꦴꦤ꧀ꦠꦏ꧀ꦏꦤ꧀ꦲꦶꦁꦨꦠꦮꦶꦲꦶꦁꦮꦸꦭꦤ꧀ꦗꦸꦭꦶꦏꦥꦼꦁꦏꦼꦂ꧉
꧋ꦲꦶꦁꦝꦸꦱꦸꦤ꧀ꦔꦢꦶꦱꦫꦶ꧈ꦝꦶꦱ꧀ꦠꦿꦶꦏ꧀ꦱꦸꦏꦥꦸꦫ꧈ꦦꦿꦧꦭꦶꦁꦒ꧈ꦠꦸꦮꦸꦃꦱꦱꦏꦶꦠ꧀ꦥꦺꦱ꧀ꦮꦸꦢꦸꦤ꧀꧈ꦠꦸꦮꦶꦤ꧀ꦱꦩ꧀ꦥꦸꦤ꧀ꦢꦶꦥꦸꦤ꧀ꦠꦶꦠꦶꦥꦿꦶꦏ꧀ꦱꦱꦒꦼꦢ꧀ꦤꦸꦭꦂ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦥꦏꦂꦪꦤ꧀ Oudheidkundigen Dienst ꦲꦁꦒꦺꦤ꧀ꦤꦶꦁꦩꦸꦭꦾꦏ꧀ꦲꦏꦼꦤ꧀ꦕꦤ꧀ꦝꦶꦯꦺꦮꦸꦱꦩ꧀ꦥꦸꦤ꧀ꦤ꧀ꦫꦩ꧀ꦥꦸꦁ꧉
꧋ꦱꦩ꧀ꦧꦼꦠ꧀ꦠꦤ꧀ꦤꦶꦁꦏꦮꦠ꧀ꦠꦺꦊꦒꦿꦩ꧀ꦝꦠꦼꦁꦡꦚ꧀ꦗꦸꦁꦥꦶꦤꦁ(ꦫꦶꦪꦺꦴ)ꦏꦮꦂꦠꦺꦴꦱ꧀ꦱꦏꦼꦤ꧀ꦥꦼꦝꦺꦴꦠ꧀꧈ꦱꦢꦪꦠꦺꦊꦒꦿꦩ꧀ꦝꦠꦼꦁꦥꦁꦒꦼꦤ꧀ꦤꦤ꧀ꦮꦲꦸꦏꦏꦶꦤ꧀ꦠꦸꦤ꧀ꦤꦏꦼꦤ꧀ꦏꦭꦪꦤ꧀ꦥꦺꦴꦱ꧀ꦱꦏꦶꦁꦯꦶꦁꦒꦥꦸꦫ꧈ꦩꦶꦠꦸꦫꦸꦠ꧀ꦥꦿꦤꦠꦤꦶꦁ K.P.M.꧉
꧋ꦲꦶꦁꦔꦪꦺꦴꦓꦾꦧꦝꦼꦮꦺꦴꦤ꧀ꦠꦼꦤ꧀ꦲꦶꦁꦏꦁꦔꦢꦤ꧀ꦤꦶꦢꦩꦼꦭ꧀ꦥꦩꦸꦭꦁꦔꦤ꧀꧈ꦲꦶꦁꦏꦁꦥꦔꦗꦂꦫꦤ꧀ꦤꦶꦥꦸꦤ꧀ꦲꦶꦁꦒꦶꦭ꧀꧈ꦲꦶꦁꦏꦁꦔꦢꦤ꧀ꦤꦶꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ Mr. ꦯꦸꦪꦸꦢꦶ꧈Dr. ꦯꦸꦥꦩ꧈Dr. ꦯꦸꦏꦶꦩꦤ꧀꧈ꦠꦸꦮꦶꦤ꧀ꦠꦸꦮꦤ꧀ꦱꦩ꧀꧉ꦥꦽꦭꦸꦏꦁꦒꦼꦚꦝꦶꦪꦤ꧀ꦤꦶꦥꦫꦠꦶꦠꦶꦪꦁꦲꦶꦁꦏꦁꦲꦩ꧀ꦧꦼꦠꦃꦲꦏꦼꦤ꧀ꦝꦠꦼꦁꦥꦔꦗꦂꦫꦤ꧀ꦲꦶꦁꦒꦶꦭ꧀꧈ꦥꦩꦸꦭꦁꦔꦶꦥꦸꦤ꧀ꦱꦩꦶꦁꦒꦸꦱꦥꦶꦱꦤ꧀꧈ꦮꦺꦴꦤ꧀ꦠꦼꦤ꧀ꦲꦶꦁꦥꦩꦸꦭꦁꦔꦤ꧀ꦲꦢꦶꦢꦂꦩ꧈ꦠꦤ꧀ꦥꦧꦪꦂꦫꦤ꧀꧉ꦥꦩ꧀ꦧꦶꦏꦏ꧀ꦏꦶꦥꦸꦤ꧀ꦧꦼꦚ꧀ꦗꦶꦁꦥꦸꦤꦥꦠꦏ꧀ꦱꦶꦃꦢꦢꦺꦴꦱ꧀ꦉꦩ꧀ꦧꦒ꧀꧉
꧋ꦫꦸꦩꦶꦪꦶꦤ꧀ꦥꦗꦒꦺꦤ꧀ mitrailleur-compagnie ꦲꦶꦁꦕꦶꦭꦕꦥ꧀꧈ꦩꦿꦥ꧀ꦥꦗꦒꦺꦤ꧀ꦠꦶꦠꦶꦪꦁꦲꦸꦏꦸꦩ꧀ꦩꦤ꧀ꦲꦶꦁꦟꦸꦱꦏꦩ꧀ꦧꦁꦔꦤ꧀꧈ꦮꦺꦴꦤ꧀ꦠꦼꦤ꧀ꦠꦶꦪꦁ 3꧈ꦏꦸꦩꦼꦤ꧀ꦝꦤ꧀ 1꧈ꦱꦥꦸꦤꦶꦏꦮꦺꦴꦤ꧀ꦠꦼꦤ꧀ꦮꦂꦠꦺꦴꦱ꧀꧈ꦥꦗꦒꦺꦤ꧀ꦮꦲꦸꦥꦸꦤ꧀ꦮꦼꦮꦃꦲꦶꦢꦢꦺꦴꦱ꧀ꦠꦶꦪꦁ 10꧈ꦏꦸꦩꦼꦤ꧀ꦝꦤ꧀ 1꧈ꦏꦗꦮꦶꦲꦶꦁꦥꦺꦴꦱ꧀ꦏ꧀ꦭꦕꦼꦱ꧀꧈ꦥꦗꦒꦺꦤ꧀ꦱꦤꦺꦱ꧀ꦱꦤꦺꦱ꧀ꦱꦶꦥꦸꦤ꧀ꦧꦝꦼꦢꦶꦥꦸꦤ꧀ꦲꦶꦕꦭ꧀ꦭꦶ꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦲꦶꦁꦭꦺꦥꦺꦤ꧀ꦥꦚ꧀ꦗꦫꦶꦁꦔꦤ꧀꧈ꦨꦠꦮꦶ꧈ꦮꦺꦴꦤ꧀ꦠꦼꦤ꧀ꦱꦠꦸꦁꦒꦶꦭ꧀ꦭꦶꦁꦭꦉꦲꦺꦱ꧀ꦠꦿꦶꦲꦢꦸꦱ꧀ꦏꦼꦊꦩ꧀ꦮꦺꦴꦤ꧀ꦠꦼꦤ꧀ꦲꦶꦁꦠꦼꦔꦃ꧈ꦭꦗꦼꦁꦮꦺꦴꦤ꧀ꦠꦼꦤ꧀ꦠꦶꦪꦁꦲꦺꦱ꧀ꦠꦿꦶꦱꦤꦺꦱ꧀ꦱꦶꦥꦸꦤ꧀ꦱꦸꦩꦼꦉꦥ꧀ꦤꦼꦢꦾꦤꦸꦭꦸꦁꦔꦶ꧈ꦱꦉꦁꦭꦉꦏꦼꦕꦼꦥꦼꦁꦭꦗꦼꦁꦲꦁꦒꦸꦊꦠ꧀꧈ꦩꦭꦃꦲꦶꦁꦏꦁꦠꦸꦠꦸꦭꦸꦁꦧꦝꦼꦏꦠꦸꦠ꧀꧉ꦲꦶꦁꦔꦿꦶꦏꦸꦮꦺꦴꦤ꧀ꦠꦼꦤ꧀ꦠꦶꦪꦁꦲꦺꦱ꧀ꦠꦿꦶꦱꦤꦺꦱ꧀ꦱꦶꦥꦸꦤ꧀ꦩꦭꦶꦃꦲꦁꦒꦼꦧꦾꦸꦂꦤꦸꦭꦸꦁꦔꦶ꧈ꦤꦔꦶꦁꦲꦶꦁꦒꦶꦃꦧꦢꦼꦃꦠꦸꦩꦸꦠ꧀ꦏꦭꦥ꧀꧈ꦫꦲꦪꦸꦤꦶꦥꦸꦤ꧀ꦭꦗꦼꦁꦏꦱꦸꦩꦼꦉꦥ꧀ꦥꦤ꧀ꦲꦶꦁꦠꦶꦠꦶꦪꦁꦱꦤꦺꦱ꧀꧈ꦗꦼꦭꦺꦃꦗꦼꦭꦺꦃꦤꦼꦝꦠꦸꦭꦸꦁ꧈ꦮꦸꦱꦤꦮꦺꦴꦤ꧀ꦠꦼꦤ꧀ꦗꦸꦫꦸꦧꦲꦶꦠꦱꦸꦩꦼꦉꦥ꧀ꦭꦗꦼꦁꦩꦶꦠꦸꦭꦸꦁꦔꦶ꧈ꦱꦢꦪꦏꦼꦠꦸꦭꦸꦁꦔꦤ꧀꧈ꦮꦶꦭꦸꦗꦼꦁ꧈ꦤꦩꦸꦁꦭꦉꦲꦶꦁꦏꦁꦏꦼꦕꦼꦩ꧀ꦥ꧀ꦭꦸꦁꦱꦏꦮꦶꦠ꧀ꦫꦒꦶꦉꦏꦲꦺꦴꦱ꧀꧉
꧋ꦏꦾꦲꦶꦩꦸꦃꦲꦩ꧀ꦩꦢ꧀ꦪꦸꦯꦸꦥ꧀ꦲꦶꦁꦯꦸꦩ꧀ꦥꦾꦸꦃ꧈ꦩꦶꦱꦸꦮꦸꦂꦢꦢꦺꦴꦱ꧀ꦝꦸꦏꦸꦤ꧀ꦥꦼꦁꦥꦼꦔꦤ꧀꧈ꦲꦶꦁꦏꦁꦝꦠꦼꦁꦲꦶꦁꦔꦿꦶꦏꦸꦔꦤ꧀ꦠꦺꦴꦱ꧀ꦠꦶꦪꦁꦲꦺꦮꦺꦴꦤ꧀ꦲꦺꦮꦺꦴꦤ꧀꧉ꦏꦕꦫꦶꦪꦺꦴꦱ꧀ꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦏꦾꦲꦶꦮꦲꦸꦒꦝꦃꦏꦱꦒꦼꦢ꧀ꦢꦤ꧀ꦲꦚ꧀ꦗꦩ꧀ꦥꦺꦤ꧀ꦤꦶꦏꦢꦺꦴꦱ꧀ꦩꦏꦠꦼꦤ꧀꧈ꦏꦭꦮꦺꦴꦤ꧀ꦠꦼꦤ꧀ꦲꦶꦁꦩꦼꦏꦃꦢꦶꦥꦸꦤ꧀ꦮꦸꦭꦁꦕꦫꦤꦶꦁꦲꦚ꧀ꦗꦩ꧀ꦥꦺꦤ꧀ꦤꦶꦱꦫꦤꦲꦼꦩꦺꦭ꧀ꦢꦼꦤꦶꦁꦱꦺꦃꦄꦃꦩꦢ꧀ꦩꦱ꧀ꦱꦮꦶ꧈ꦲꦱ꧀ꦭꦶꦱꦏꦶꦁꦏꦲꦆꦫꦺꦴ꧉ꦏꦭꦏꦼꦩꦶꦱ꧀ꦏꦼꦥꦼꦁꦏꦼꦂ꧈ꦠꦶꦠꦶꦪꦁꦲꦶꦁꦏꦁꦝꦠꦼꦁꦗꦗꦩ꧀ꦥꦶꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦮꦺꦴꦤ꧀ꦠꦼꦤ꧀ 3000꧉ꦏꦾꦲꦶꦮꦲꦸꦠꦼꦤ꧀ꦥꦸꦫꦸꦤ꧀ꦢꦶꦥꦸꦤ꧀ꦱꦸꦏꦤ꧀ꦤꦶꦥꦸꦤꦥꦥꦸꦤꦥ꧈ꦩꦶꦤ꧀ꦝꦏ꧀ꦕꦧꦂꦢꦪꦤꦶꦥꦸꦤ꧀꧉
꧋ꦔ꧀ꦭꦼꦉꦱ꧀ꦱꦏꦼꦤ꧀ꦏꦊꦥꦠ꧀ꦠꦤ꧀꧉
꧋ꦲꦶꦁꦏꦗꦮꦺꦤ꧀ꦤꦺꦴꦩꦼꦂ6 ꦏꦕ 110 ꦲꦶꦁꦏꦫꦁꦔꦤ꧀꧇ꦠꦼꦝꦧꦏꦸꦠꦸꦮꦶꦤ꧀ꦏꦧꦺꦴꦫꦺꦴꦱ꧀ꦱꦤ꧀ꦲꦶꦁꦠꦤꦃꦏꦢꦸꦮꦁꦯꦸꦫꦏꦂꦠ꧈ꦲꦶꦁꦲꦸꦔꦼꦭ꧀ꦲꦸꦔꦼꦭ꧀ꦭꦤ꧀ꦥꦼꦫꦁꦔꦤ꧀ꦱꦶꦱꦶꦃꦠꦼꦔꦼꦤ꧀ꦒꦫꦶꦱ꧀ꦔꦤ꧀ꦝꦥ꧀ꦥꦶꦪꦩ꧀ꦧꦏ꧀꧈ꦊꦉꦱ꧀ꦱꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦔꦶꦁꦒꦶꦭ꧀ꦥꦶꦪꦩ꧀ꦧꦏ꧀꧉
