ꦮꦮꦲꦺꦴꦱ꧀ꦱꦤ꧀
꧋ꦱꦸꦱꦸꦥꦼꦲꦒꦼꦩ꧀ꦩꦶꦥꦸꦤ꧀ꦫꦗꦥꦸꦠꦿꦶꦲꦶꦁꦯꦼꦧ
꧇꧙꧇꧉
꧋ꦥꦿꦺꦴꦥꦼꦱꦺꦴꦂ Higgs ꦲꦩ꧀ꦧꦼꦧꦼꦝꦒ꧀ꦩꦶ
꧋ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸꦏꦸꦭꦭꦗꦼꦁꦲꦚꦚ꧀ꦗꦠ꧈ꦩꦶꦱ꧀ꦱꦶꦥꦸꦤ꧀ꦱꦤꦭꦶꦏꦲꦔꦺꦁꦔꦶꦁꦔꦶꦊꦩ꧀ꦥꦺꦁꦔꦶꦁꦱꦶꦔꦧꦫꦺꦴꦁ꧈ꦏꦤ꧀ꦛꦶꦲꦁꦒꦼꦫꦺꦴꦱꦺꦴꦫ꧈ꦱꦶꦔꦧꦫꦺꦴꦁꦭꦗꦼꦁꦠꦔꦶ꧈ꦱꦸꦏꦸꦤꦶꦥꦸꦤ꧀ꦲꦶꦁꦏꦁꦱꦠꦸꦁꦒꦭ꧀ꦥꦶꦚ꧀ꦕꦁ꧈ꦥꦸꦤ꧀ꦱꦶꦔꦱꦼꦩꦁꦱꦼꦩꦁꦱꦏꦼꦝꦥ꧀꧈ꦱꦭꦗꦼꦁꦔꦶꦥꦸꦤ꧀ꦭꦸꦩꦗꦼꦁꦝꦠꦼꦁꦥꦉꦢꦺꦤ꧀ꦥꦱꦶꦂ꧉
꧋ꦏꦥꦶꦠꦤ꧀ Orme ꦲꦶꦁꦏꦁꦮꦺꦴꦤ꧀ꦠꦼꦤ꧀ꦮꦶꦁꦏꦶꦁꦏꦸꦭꦭꦗꦼꦁꦲꦚꦚ꧀ꦗꦠ꧈ꦥꦱꦶꦂꦱꦔꦤ꧀ꦝꦥ꧀ꦥꦶꦁꦮꦼꦠꦼꦁꦱꦶꦔꦏꦼꦠꦶꦔꦭ꧀ꦏꦸꦩꦼꦧꦸꦭ꧀꧈ꦲꦶꦁꦒꦶꦃꦤꦩꦸꦁꦥꦸꦤꦶꦏꦲꦁꦱꦭ꧀ꦲꦁꦱꦭ꧀ꦭꦤ꧀ꦤꦶꦁꦥꦚꦚ꧀ꦗꦠꦤꦶꦥꦸꦤ꧀ꦮꦲꦸ꧉ꦱꦤꦢꦾꦤ꧀ꦱꦚ꧀ꦗꦠꦏꦸꦭꦱꦩꦶꦩꦼꦠꦼꦁ꧈ꦏꦸꦭꦱꦢꦪꦧꦺꦴꦠꦼꦤ꧀ꦱꦒꦼꦢ꧀ꦲꦺꦁꦒꦭ꧀ꦲꦺꦁꦒꦭ꧀ꦲꦚꦚ꧀ꦗꦠ꧈ꦱꦶꦔꦤꦶꦥꦸꦤ꧀ꦧꦫꦺꦴꦁꦱꦩ꧀ꦥꦸꦤ꧀ꦩꦸꦱ꧀ꦤꦮꦺꦴꦤ꧀ꦠꦼꦤ꧀ꦱꦮꦶꦁꦏꦶꦁꦔꦶꦁꦥꦉꦢꦺꦤ꧀꧉
꧋ꦱꦭꦗꦼꦁꦔꦶꦥꦸꦤ꧀ꦱꦶꦔꦮꦲꦸꦏꦸꦭꦏꦺꦤ꧀ꦢꦼꦭ꧀ꦭꦏꦼꦤ꧀ꦏꦼꦩꦮꦺꦴꦤ꧀꧈ꦏꦸꦭꦱꦢꦪꦭꦗꦼꦁꦩꦸꦫꦸꦒ꧀ꦒꦶꦥꦿꦺꦴꦥꦼꦱꦺꦴꦂHiggs꧈ꦲꦶꦁꦏꦁꦏꦭꦥꦸꦤꦶꦏꦏꦏꦶꦤ꧀ꦠꦼꦤ꧀ꦩꦤꦮꦶꦧꦺꦴꦠꦼꦤ꧀ꦥꦼꦗꦃꦲꦶꦁꦒꦶꦃꦠꦠꦸꦱꦔꦼꦠ꧀꧉ꦲꦤꦔꦶꦁꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦒꦸꦩꦸꦤ꧀ꦭꦤ꧀ꦧꦶꦔꦃꦲꦶꦁꦩꦤꦃꦏꦸꦭꦱꦢꦪ꧈ꦢꦺꦤꦺꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦠꦔꦶꦏꦤ꧀ꦛꦶꦱꦧꦂ꧈ꦏꦕꦩꦿꦶꦥꦠ꧀ꦠꦶꦥꦸꦤ꧀ꦧꦶꦫꦸꦠꦏ꧀ꦱꦶꦃꦕꦸꦩꦤ꧀ꦛꦺꦭ꧀ꦲꦶꦁꦲꦶꦫꦸꦁꦔꦶꦥꦸꦤ꧀꧈ꦱꦲꦔꦶꦱꦺꦤ꧀ꦤꦶꦱꦚ꧀ꦗꦠꦤꦶꦥꦸꦤ꧀ꦤꦼꦢꦾꦔꦺꦴꦪꦏ꧀ꦱꦶꦔꦧꦫꦺꦴꦁꦲꦶꦁꦏꦁꦱꦩ꧀ꦥꦸꦤ꧀ꦏꦼꦠꦠꦺꦴꦤ꧀ꦮꦲꦸ꧉ꦏꦥꦶꦠꦤ꧀ Orme ꦲꦩ꧀ꦧꦸꦗꦼꦁꦱꦲꦕꦼꦭꦸꦏ꧀ꦕꦼꦭꦸꦏ꧀꧇ꦌ꧈ꦧꦭꦶ꧉ꦥꦿꦺꦴꦥꦼꦱꦺꦴꦂ Higgs ꦲꦩ꧀ꦧꦼꦔꦺꦴꦏ꧀꧈ꦱ꧀ꦮꦫꦤꦶꦥꦸꦤ꧀ꦕꦸꦩ꧀ꦭꦼꦫꦶꦁ꧇ꦄꦃ꧈ꦲꦼꦩꦺꦴꦃ꧉ꦪꦺꦤ꧀ꦏꦺꦴꦮꦼꦱꦏꦭꦺꦴꦫꦺꦴꦤ꧀ꦏꦶꦫꦤꦼꦔꦶꦫ꧈ꦩꦤꦮꦲꦏꦸꦲꦺꦴꦫꦧꦏꦭ꧀ꦩꦊꦱ꧀ꦲꦸꦏꦸꦩ꧀ꦩꦫꦁꦏꦸꦕꦶꦁꦒꦼꦝꦼꦲꦭꦩꦲꦸ꧈ꦱꦧꦧ꧀ꦮꦶꦱ꧀ꦲꦤꦸꦁꦒꦁꦔꦶꦲꦶꦁꦮꦼꦠꦼꦁꦏꦸ꧈ꦏꦺꦴꦮꦼꦏ꧀ꦭꦶꦫꦸꦧꦔꦼꦠ꧀꧉
꧋ꦏꦥꦶꦠꦤ꧀ Orme ꦱꦒꦼꦢ꧀ꦤꦸꦠꦸꦠ꧀ꦠꦶꦥ꧀ꦭꦗꦼꦁꦔꦶꦥꦸꦤ꧀ꦥꦿꦺꦴꦥꦼꦱꦺꦴꦂꦮꦲꦮꦺꦴꦤ꧀ꦠꦼꦤ꧀ꦥꦸꦕꦏ꧀ꦏꦶꦁꦥꦉꦢꦺꦤ꧀ꦲꦶꦁꦏꦁꦏꦥꦶꦱꦤ꧀꧈ꦲꦤꦔꦶꦁꦮꦶꦕꦤ꧀ꦠꦼꦤ꧀ꦤꦶꦁꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦩꦸꦫꦶꦃꦱꦩ꧀ꦥꦸꦤ꧀ꦤꦸꦠꦸꦠ꧀ꦠꦶꦱꦶꦔꦮꦲꦸ꧈ꦠꦸꦩꦿꦥ꧀ꦏꦥꦶꦠꦤ꧀ Orme ꦠꦸꦮꦶꦤ꧀ꦏꦸꦭ꧈ꦲꦶꦁꦏꦁꦧꦺꦴꦠꦼꦤ꧀ꦮꦠꦮꦶꦱ꧀ꦢꦔꦸꦲꦶꦁꦒꦶꦃꦢꦸꦩꦸꦒꦶꦲꦶꦁꦔꦿꦶꦏꦸ꧈ꦥꦸꦤꦶꦏꦧꦧꦂꦥꦶꦱꦤ꧀ꦧꦺꦴꦠꦼꦤ꧀ꦱꦒꦼꦢ꧀꧉ꦥꦿꦺꦴꦥꦼꦱꦺꦴꦂꦮꦲꦸꦏꦗꦮꦶꦏꦼꦧꦫꦸꦠ꧀ꦲꦶꦫꦸꦁꦔꦶꦥꦸꦤ꧀꧈ꦥꦶꦪꦩ꧀ꦧꦏ꧀ꦏꦶꦥꦸꦤ꧀ꦮꦶꦭꦸꦗꦼꦁꦧꦺꦴꦠꦼꦤ꧀ꦥꦸꦤꦥꦥꦸꦤꦥ꧈ꦲꦤꦔꦶꦁꦏꦭꦥꦸꦤꦶꦏꦏꦼꦧꦿꦔꦱ꧀ꦱꦲꦤꦼꦥ꧀ꦱꦸꦱꦔꦼꦠ꧀꧉ꦏꦸꦭꦱꦢꦪꦲꦔꦫꦶꦃꦲꦫꦶꦃ꧈ꦩꦸꦫꦶꦃꦤꦿꦶꦩꦃꦲꦝꦠꦼꦁꦏꦧꦼꦒ꧀ꦗꦤ꧀ꦤꦶꦥꦸꦤ꧀ꦮꦲꦸ꧈ꦲꦤꦔꦶꦁꦧꦺꦴꦠꦼꦤ꧀ꦢꦶꦥꦸꦤ꧀ꦥꦲꦺꦭꦸꦧꦧꦂꦥꦶꦱꦤ꧀꧉
꧋ꦮꦁꦱꦸꦭ꧀ꦭꦤ꧀ꦤꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs꧇ꦒꦼꦤꦼꦪ꧈ꦠ꧈Adams ꦲꦏꦸꦮꦶꦱ꧀ꦤꦠꦺꦴꦤ꧀ꦤꦶꦏꦼꦮꦤ꧀ꦩꦲꦸ꧈ꦭꦤ꧀ꦲꦏꦸꦲꦭꦸꦮꦸꦁꦩꦠꦺꦤ꧀ꦤꦶꦱꦶꦔꦧꦫꦺꦴꦁꦭꦺꦴꦫꦺꦴꦠꦶꦤꦶꦩ꧀ꦧꦁꦱꦶꦗꦶ꧈ꦲꦤꦔꦶꦁꦩꦤꦮꦏꦺꦴꦮꦼꦱꦏꦭꦺꦴꦫꦺꦴꦤ꧀ꦥꦝꦮꦼꦢꦶ꧈ꦮꦶꦱ꧀ꦩꦸꦭꦶꦃꦲꦧꦲꦼ꧉
꧋ꦏꦭꦥꦸꦤꦶꦏꦏꦸꦭꦏꦼꦢꦃꦔꦏꦼꦤ꧀ꦤꦶꦏꦤ꧀ꦛꦶꦧ꧀ꦭꦏ꧈ꦩꦤꦮꦶꦏꦸꦭꦏꦥꦼꦔꦶꦤ꧀ꦱꦔꦼꦠ꧀ꦲꦤꦸꦫꦸꦠ꧀ꦠꦶꦥꦏꦺꦤ꧀ꦤꦶꦥꦸꦤ꧀ꦥꦿꦺꦴꦥꦼꦱꦺꦴꦂ Higgs ꦮꦲꦸ꧈ꦲꦤꦁꦔꦶꦁꦏꦥꦶꦠꦤ꧀ꦎꦂꦩꦼꦲꦶꦁꦏꦁꦤꦼꦥ꧀ꦱꦸꦲꦩꦁꦱꦸꦭ꧀ꦭꦶꦩꦏꦠꦼꦤ꧀꧇ꦮꦶꦱ꧀꧈ꦮꦶꦱ꧀꧈ꦫꦏ꧀ꦲꦶꦏꦶꦱꦶꦁꦧꦶꦱꦩꦸꦠꦸꦱ꧀ꦱꦶ꧉ꦏꦺꦴꦮꦼꦏꦸꦮꦶꦏꦶꦫꦏꦸꦫꦢꦧꦶꦔꦸꦁꦗꦭꦂꦫꦤ꧀ꦱꦏꦲꦁꦒꦺꦴꦤ꧀ꦩꦸꦠꦶꦧꦩꦲꦸ꧈ꦤꦺꦏ꧀ꦲꦺꦴꦫ꧈ꦏꦺꦴꦮꦼꦩꦺꦴꦁꦱꦏꦺꦴꦤ꧀ꦝꦲꦩꦁꦏꦺꦴꦤꦺꦴ꧉ꦢꦼꦊꦁꦔꦼꦤ꧀ꦭꦺꦴꦠꦥꦏ꧀ꦏꦼ꧈ꦲꦥꦏꦺꦴꦮꦼꦮꦼꦫꦸꦃꦒꦼꦠꦶꦃꦲꦶꦏꦶ꧈ꦲꦪꦺꦴꦥꦝꦢꦶꦭꦕꦏ꧀꧈ꦤꦔꦶꦁꦏꦫꦺꦴꦩꦥꦒ꧀ꦒꦏꦼꦲꦔꦶꦤ꧀꧉ꦲꦶꦁꦏꦤꦩꦼꦁꦏꦺꦴꦫꦏ꧀ꦧꦏꦭ꧀ꦏꦼꦠꦼꦩꦸ꧈ꦲꦤꦔꦶꦁꦲꦺꦭꦶꦁꦭ꧀ꦲꦺꦴ꧈ꦲꦗꦲꦩ꧀ꦧꦼꦝꦶꦭ꧀ꦤꦺꦏ꧀ꦲꦶꦱꦶꦃꦲꦢꦺꦴꦃꦧꦔꦼꦠ꧀꧉
꧋ꦥꦿꦺꦴꦥꦼꦱꦺꦴꦂ Higgs ꦲꦩꦁꦱꦸꦭ꧀ꦭꦶ꧇ꦲꦶꦪꦧꦼꦕꦶꦏ꧀꧈ꦩꦸꦁꦧꦲꦼꦲꦗꦤꦼꦥ꧀ꦱꦸꦩꦤꦺꦃ꧈ꦲꦏꦸꦲꦺꦴꦫꦢꦸꦮꦼꦒꦒꦱ꧀ꦱꦤ꧀ꦲꦭ꧈ꦲꦏꦸꦩꦸꦁꦲꦉꦥ꧀ꦲꦔꦼꦠꦺꦴꦏ꧀ꦲꦏꦼꦩꦼꦚꦁꦏꦼꦮꦤ꧀ꦏꦲꦼ꧈ꦧꦼꦢꦤꦼꦲꦏꦸꦏꦫꦺꦴꦮꦺꦴꦁ Zeu꧉
꧋ꦱꦭꦗꦼꦁꦔꦶꦥꦸꦤ꧀ꦏꦸꦭꦱꦢꦪꦤꦸꦤ꧀ꦠꦼꦤ꧀ꦩꦶꦮꦶꦠ꧀ꦠꦶꦲꦁꦒꦺꦤ꧀ꦤꦶꦥꦸꦤ꧀ꦲꦩ꧀ꦧꦸꦧꦸꦗꦼꦁ꧈ꦠꦤ꧀ꦱꦃꦔ꧀ꦭꦕꦏ꧀ꦠꦥꦏ꧀ꦏꦶꦁꦱꦶꦔ꧈ꦩꦶꦁꦒꦃꦩꦸꦝꦸꦤ꧀ꦥꦉꦢꦺꦤ꧀꧉ꦱꦉꦁꦭꦩ꧀ꦥꦃꦏꦸꦭꦱꦢꦪꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦱꦩ꧀ꦥꦸꦤ꧀ꦮꦺꦴꦤ꧀ꦠꦼꦤ꧀ꦱꦠꦼꦔꦃꦗꦩ꧀꧈ꦏꦸꦭꦱꦢꦪꦏꦒꦺꦠ꧀꧈ꦢꦺꦤꦺꦱꦸꦩꦼꦉꦥ꧀ꦱꦶꦔꦧꦫꦺꦴꦁ꧈ꦲꦶꦁꦏꦁꦠꦼꦧꦶꦃꦲꦶꦥꦸꦤ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦒꦁꦱꦭ꧀ꦲꦠꦸꦱ꧀ꦩꦺꦠꦼꦂꦱꦏꦶꦁꦏꦸꦭꦱꦢꦪ꧉ꦏꦭꦥꦸꦤꦶꦏꦏꦸꦭꦱꦢꦪꦲꦶꦁꦒꦶꦃꦭꦗꦼꦁꦏꦱꦸꦱꦸꦭ꧀ꦢꦼꦤꦶꦁꦱꦮꦠꦮꦶꦱ꧀ꦱꦶꦁꦠꦶꦪꦁ Zeu ꦲꦶꦁꦏꦁꦭꦗꦼꦁꦱꦩꦶꦏꦼꦩ꧀ꦥꦭ꧀ꦏꦭꦶꦪꦤ꧀ꦏꦸꦭꦱꦢꦪ꧈ꦲꦤꦔꦶꦁꦧꦺꦴꦠꦼꦤ꧀ꦒꦝꦃꦒꦽꦁꦱꦼꦁꦧꦧꦂꦥꦶꦱꦤ꧀꧉
꧋ꦲꦶꦁꦮꦼꦏ꧀ꦢꦭ꧀ꦥꦸꦤꦶꦏꦢꦶꦤ꧀ꦠꦼꦤ꧀ꦤꦶꦥꦸꦤ꧀ꦱꦪꦱꦶꦪꦁ꧈ꦧꦼꦤ꧀ꦠꦺꦂꦫꦶꦥꦸꦤ꧀ꦱꦪꦱꦔꦼꦠ꧀꧈ꦲꦶꦁꦱꦊꦧꦼꦠ꧀ꦠꦶꦁꦧꦼꦤ꧀ꦠꦼꦂꦫꦤ꧀ꦏꦠꦶꦔꦭ꧀ꦥꦠꦶꦁꦏꦽꦭꦥ꧀ꦏꦺꦧꦼꦏ꧀ꦏꦤ꧀ꦲꦼꦤ꧀ꦝꦼꦒ꧀ꦲꦩꦸꦤ꧀ꦲꦩꦸꦤ꧀꧈ꦏꦼꦠꦶꦔꦭ꧀ꦏꦢꦺꦴꦱ꧀ꦲꦶꦧꦼꦂꦫꦶꦁꦊꦩꦸꦠ꧀ꦩꦼꦩ꧀ꦭꦶꦪꦸꦤ꧀ꦤꦤ꧀꧈ꦲꦺꦮꦱꦩꦤ꧀ꦠꦼꦤ꧀ꦏꦭꦥꦸꦤꦶꦏꦱꦽꦁꦔꦼꦔꦼꦤꦶꦥꦸꦤ꧀ꦧꦺꦴꦠꦼꦤ꧀ꦏꦼꦠꦶꦔꦭ꧀꧈ꦗꦭꦂꦫꦤ꧀ꦱꦏꦶꦁꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦱꦧꦁꦱꦤꦶꦁꦥꦼꦝꦸꦠ꧀꧉ꦲꦶꦁꦔꦿꦶꦏꦸꦚꦼꦚꦼꦠ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦱ꧀ꦮꦫꦥꦸꦤꦥꦥꦸꦤꦥ꧈ꦱꦤꦢꦾꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦒꦤ꧀ꦠꦼꦤ꧀ꦮꦼꦝꦶ꧈ꦤꦔꦶꦁꦚꦼꦚꦼꦠ꧀ꦠꦶꦥꦸꦤ꧀ꦮꦲꦸꦭꦁꦏꦸꦁꦔꦤꦺꦃꦲꦤꦺꦃꦲꦶ꧈ꦏꦸꦭꦱꦢꦪꦱꦒꦼꦢ꧀ꦩꦶꦉꦁꦔꦏꦼꦤ꧀ꦱ꧀ꦮꦫꦤꦶꦁꦥꦱꦶꦂꦲꦶꦁꦏꦁꦒꦸꦩ꧀ꦭꦸꦤ꧀ꦝꦸꦁꦱꦏꦶꦁꦥꦸꦕꦏ꧀ꦏꦶꦁꦒꦸꦩꦸꦏ꧀꧉ꦠꦶꦠꦶꦪꦁꦰꦼꦲꦸꦱꦩꦶꦏꦼꦠꦶꦔꦭ꧀ꦱꦩꦂ꧈ꦱꦲꦱꦩꦶꦤꦸꦢꦶꦁꦤꦸꦢꦶꦁꦔꦏꦼꦤ꧀ꦠꦸꦩ꧀ꦧꦏ꧀ꦏꦶꦥꦸꦤ꧀ꦝꦠꦼꦁꦲꦶꦁꦭꦔꦶꦠ꧀꧈ꦱꦲꦭꦗꦼꦁꦤꦸꦢꦶꦁꦤꦸꦢꦶꦁꦝꦠꦼꦁꦥꦏꦩ꧀ꦥꦸꦁꦔꦤ꧀ꦤꦶꦥꦸꦤ꧀꧉ꦱꦉꦁꦏꦸꦭꦱꦮꦠꦮꦶꦱ꧀ꦢꦔꦸꦧꦺꦴꦠꦼꦤ꧀ꦔꦮꦱ꧀ꦱꦏꦼꦤ꧀ꦝꦠꦼꦁꦠꦶꦠꦶꦪꦁꦮꦲꦸ꧈ꦠꦶꦠꦶꦪꦁꦮꦲꦸꦭꦗꦼꦁꦱꦩꦶꦩꦶꦁꦒꦠ꧀꧉
꧋ꦏꦸꦭꦲꦶꦁꦒꦶꦃꦱꦸꦩꦼꦢꦾꦧꦝꦼꦔꦼꦠꦸꦠ꧀ꦠꦏꦼꦤ꧀ꦠꦶꦠꦶꦪꦁꦮꦲꦸ꧈ꦲꦔꦶꦤ꧀ꦠꦼꦤ꧀ꦧꦶꦭꦶꦃꦮꦺꦴꦤ꧀ꦠꦼꦤ꧀ꦱꦧꦧ꧀ꦱꦧꦧ꧀ꦧꦶꦥꦸꦤ꧀ꦲꦶꦁꦏꦁꦥꦽꦭꦸ꧈ꦲꦁꦒꦺꦤ꧀ꦤꦶꦥꦸꦤ꧀ꦠꦶꦠꦶꦪꦁꦮꦲꦸꦱꦩꦶꦏꦼꦱꦃꦢꦢꦏ꧀ꦏꦤ꧀꧉ꦲꦤꦔꦶꦁꦥꦿꦺꦴꦥꦼꦱꦺꦴꦂ Higgs ꦧꦺꦴꦠꦼꦤ꧀ꦥꦸꦫꦸꦤ꧀ꦧꦧꦂꦥꦶꦱꦤ꧀꧈ꦭꦤ꧀ꦏꦥꦶꦠꦤ꧀ Orme ꦲꦶꦁꦏꦁꦠꦏ꧀ꦱꦶꦃꦔꦺꦔꦼꦠ꧀ꦠꦶꦮꦶꦕꦤ꧀ꦠꦼꦤ꧀ꦤꦶꦥꦸꦤ꧀ꦥꦥꦼꦱꦺꦴꦂ Higgs ꦲꦶꦁꦏꦁꦧꦺꦴꦠꦼꦤ꧀ꦚꦏꦼꦕꦏ꧀ꦲꦏꦼꦤ꧀ꦲꦶꦁꦔꦗꦼꦁ꧈ꦤꦩꦸꦁꦔꦁꦏꦠ꧀ꦥꦸꦤ꧀ꦝꦏ꧀꧉
꧋ꦏꦤ꧀ꦛꦶꦲꦁꦒꦺꦴꦱꦺꦴꦏ꧀ꦏꦶꦏꦕꦩꦿꦶꦥꦠ꧀ꦠꦶꦥꦸꦤ꧀ꦧꦶꦫꦸꦠꦸꦮꦶꦤ꧀ꦔꦸꦱꦥ꧀ꦥꦶꦫꦲꦶꦤꦶꦥꦸꦤ꧀꧈ꦥꦿꦺꦴꦥꦼꦱꦺꦴꦂ Higgs ꦮꦶꦕꦤ꧀ꦠꦼꦤ꧀ꦩꦏꦠꦼꦤ꧀꧇ꦧꦺꦴꦏ꧀ꦧꦺꦤ꧀꧈ꦮꦺꦴꦁꦮꦺꦴꦁ
