ꦏꦧꦂꦮꦂꦤꦶꦮꦂꦤꦶ꧋ꦥꦼꦛꦶꦏ꧀ꦏꦤ꧀ꦱꦏꦶꦁꦱꦼꦫꦠ꧀ꦱꦼꦫꦠ꧀ꦏꦧꦂꦱꦤꦺꦱ꧀ꦝꦸ
꧋ꦗꦸꦫꦸꦏꦧꦂꦏꦗꦮꦺꦤ꧀ꦩꦂꦠꦺꦴꦱ꧀ꦱꦏꦼꦤ꧀꧈ꦲꦶꦁꦱꦸꦤ꧀ꦱ꧀ꦭꦩ꧀ꦥꦂꦫꦼꦗ꧈ꦎꦤ꧀ꦢꦼꦂꦗꦨꦸꦁ꧈ꦩꦭꦁ꧈ꦥꦸꦭꦶꦱꦶꦩꦁꦒꦶꦃꦧꦁꦏꦼꦠꦶꦪꦁꦗꦊꦂ꧈ꦤꦤ꧀ꦝꦁꦠꦠꦸꦒꦸꦭꦸꦤꦶꦥꦸꦤ꧀ꦩꦺꦃꦠꦸꦒꦼꦭ꧀꧈ꦮꦺꦴꦤ꧀ꦠꦼꦤ꧀ꦱꦠꦼꦔꦃꦲꦶꦁꦥꦠꦼꦒꦭ꧀ꦭꦤ꧀꧉ꦥꦸꦭꦶꦱꦶꦲꦶꦁꦒꦶꦃꦱꦩ꧀ꦥꦸꦤ꧀ꦭꦗꦼꦁꦲꦁꦱꦭ꧀ꦏꦠꦿꦁꦔꦤ꧀꧉
꧋ꦱꦩꦁꦏꦼꦱꦩ꧀ꦥꦸꦤ꧀ꦏꦠꦼꦠꦼꦥ꧀ꦥꦏꦼꦤ꧀꧈ꦠꦶꦤ꧀ꦢꦏ꧀ꦢꦊꦩ꧀ꦏꦁꦗꦼꦁꦠꦸꦮꦤ꧀ꦲꦶꦁꦏꦁꦮꦶꦕꦏ꧀ꦱꦟꦝꦠꦼꦁꦯꦸꦫꦏꦂꦠꦠꦸꦮꦶꦤ꧀ꦔꦪꦺꦴꦓꦾꦏꦂꦠ꧈ꦔꦼꦤ꧀ꦠꦺꦴꦱ꧀ꦱꦶꦥꦩ꧀ꦧꦶꦏꦏ꧀ꦏꦶꦁꦥꦉꦥꦠ꧀ꦠꦤ꧀ꦫꦢ꧀ꦏꦮꦸꦭ꧈ꦝꦮꦃꦲꦶꦁꦢꦶꦤ꧀ꦠꦼꦤ꧀ꦱ꧀ꦭꦱꦠꦁꦒꦭ꧀ꦏꦥꦶꦁ 15 ꦩꦺꦲꦶ꧈ꦧꦝꦼꦲꦚ꧀ꦗꦸꦗꦸꦒ꧀ꦯꦸꦫꦏꦂꦠꦫꦸꦩꦶꦪꦶꦤ꧀꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦠꦸꦮꦤ꧀ W. Steuvens ꦆꦤ꧀ꦱꦼꦥꦺꦏ꧀ꦠꦸꦂꦲꦶꦁꦧꦧ꧀ꦠꦠꦤꦺꦤ꧀꧈ꦱꦩ꧀ꦥꦸꦤ꧀ꦧꦶꦝꦭ꧀ꦝꦠꦼꦁꦲꦶꦁꦨꦚ꧀ꦗꦂꦩꦱꦶꦤ꧀꧈ꦥꦽꦭꦸꦧꦝꦼꦚꦶꦤꦲꦸꦏꦮꦺꦴꦤ꧀ꦠꦼꦤ꧀ꦤꦤ꧀ꦤꦶꦥꦸꦤ꧀ꦠꦠꦤꦺꦤ꧀ꦲꦶꦁꦔꦿꦶꦏꦸ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦲꦶꦁꦱꦊꦧꦼꦠ꧀ꦠꦶꦁꦏꦝꦠꦺꦴꦤ꧀ꦯꦸꦫꦏꦂꦠꦩꦼꦤ꧀ꦠꦱ꧀ꦏꦼꦥꦤ꧀ꦢꦸꦁꦔꦤ꧀꧈ꦢꦸꦂꦗꦤꦱꦒꦼꦢ꧀ꦩꦼꦤ꧀ꦝꦼꦠ꧀ꦏꦒꦸꦁꦔꦤ꧀ꦢꦊꦩ꧀ꦮꦲꦺꦴꦱ꧀ꦮꦲꦺꦴꦱ꧀ꦠꦸꦮꦶꦤ꧀ꦲꦶꦤ꧀ꦠꦼꦤ꧀ꦲꦶꦤ꧀ꦠꦼꦤ꧀ꦮꦺꦴꦱꦺꦤ꧀꧈ꦱꦢꦪꦉꦒꦶ f 20.000,-
꧋ꦠꦸꦮꦤ꧀ꦏꦺꦴꦥꦶꦏ꧀ꦱꦶꦪꦺꦴꦁ꧈ꦱꦸꦢꦒꦂꦲꦶꦁꦏꦼꦝꦶꦫꦶ꧈ꦏꦮꦂꦠꦺꦴꦱ꧀ꦱꦏꦼꦤ꧀ꦏꦶꦏꦶꦫꦁꦔꦤ꧀ꦲꦂꦠ f 60.000,- ꦠꦩ꧀ꦠꦸꦏꦼꦩꦮꦺꦴꦤ꧀ꦏꦶꦤ꧀ꦠꦼꦤ꧀ꦏꦶꦤ꧀ꦠꦼꦤ꧀ꦧꦝꦼꦥꦭꦶꦠ꧀꧉
꧋ꦒꦺꦴꦭꦺꦴꦁꦔꦤ꧀ꦧꦺꦴꦁꦱꦄꦩ꧀ꦧꦺꦴꦤ꧀꧈ꦫꦸꦩꦲꦺꦴꦱ꧀ꦏꦶꦏꦶꦫꦁꦔꦤ꧀ꦮꦏꦶꦭ꧀ꦮꦺꦴꦤ꧀ꦠꦼꦤ꧀ꦲꦶꦁꦫꦢ꧀ꦏꦮꦸꦭ꧈ꦲꦮꦶꦠ꧀ꦤꦩꦸꦁꦱꦠꦸꦁꦒꦭ꧀꧈ꦲꦩꦶꦭꦱꦩꦶꦒꦝꦃꦲꦠꦸꦂꦝꦠꦼꦁꦥꦩꦉꦤ꧀ꦠꦃ꧈ꦠꦼꦩ꧀ꦧꦼꦚꦸꦮꦸꦤ꧀ꦮꦼꦮꦲꦶꦥꦸꦤ꧀ꦮꦏꦶꦭ꧀ꦧꦺꦴꦁꦱꦄꦩ꧀ꦧꦺꦴꦤ꧀꧉
꧋ꦏꦮꦂꦠꦺꦴꦱ꧀ꦱꦏꦼꦤ꧀꧈ꦒꦿꦶꦪꦱꦏꦶꦠ꧀ꦤꦶꦂꦩꦭꦲꦶꦁꦏꦫꦔꦚꦂ꧈ꦏꦼꦝꦸ꧈ꦧꦝꦼꦧꦁꦏꦿꦸꦠ꧀꧈ꦤꦼꦢꦾꦢꦶꦥꦸꦤ꧀ꦊꦭꦁꦔꦏꦼꦤ꧀꧉
꧋ꦏꦸꦭꦶꦏꦸꦭꦶꦧꦲꦶꦠꦲꦶꦁꦏꦁꦱꦩꦶꦚꦩ꧀ꦧꦸꦠ꧀ꦢꦩꦼꦭ꧀ꦲꦶꦁ Vereeniging de Prauwenveer ꦱꦩꦶꦩꦺꦴꦒꦺꦴꦏ꧀꧈ꦥꦿꦏꦮꦶꦱ꧀ꦱꦶꦥꦸꦤ꧀꧇ꦱꦩꦶꦤꦼꦝꦲꦶꦤ꧀ꦝꦏ꧀ꦏꦤ꧀ꦧꦭꦺꦴꦚ꧀ꦗꦧꦺꦴꦠꦼꦤ꧀ꦢꦶꦥꦸꦤ꧀ꦥꦶꦠꦸꦫꦸꦠ꧀ꦠꦶ꧉ꦤꦔꦶꦁꦱꦉꦁꦱꦩ꧀ꦥꦸꦤ꧀ꦏꦱꦼꦉꦥ꧀ꦥꦤ꧀ꦢꦼꦤꦶꦁꦲꦶꦁꦏꦁꦧꦸꦥꦠꦶꦲꦶꦁꦨꦠꦮꦶ꧈ꦭꦗꦼꦁꦱꦩꦶꦥꦸꦫꦸꦤ꧀ꦚꦩ꧀ꦧꦸꦠ꧀ꦢꦩꦼꦭ꧀ꦩꦭꦶꦃ꧉
꧋ꦗꦭꦂꦫꦤ꧀ꦱꦏꦶꦁꦏꦛꦃꦥꦫꦮꦂꦒ P.E.B. ꦲꦶꦁꦏꦁꦱꦩꦶꦤꦼꦝꦩꦼꦢꦭ꧀꧈ꦲꦩꦶꦭꦠꦸꦮꦤ꧀ Kies ꦠꦸꦮꦤ꧀ Meister ꦠꦸꦮꦶꦤ꧀ꦠꦸꦮꦤ꧀ Roep ꦱꦩꦶꦧꦝꦼꦢꦩꦼꦭ꧀ꦱꦼꦱꦺꦴꦫꦃꦏꦁꦒꦼꦩꦿꦤꦤꦶꦩꦤꦃꦲꦶꦥꦸꦤꦃꦲꦶꦥꦸꦤ꧀ꦠꦶꦪꦁꦏꦛꦃ꧉
Mr. Dr. Nazief ꦱꦤꦢꦾꦤ꧀ꦱꦩ꧀ꦥꦸꦤ꧀ꦏꦏꦶꦤ꧀ꦠꦸꦤ꧀ꦤꦤ꧀ꦲꦂꦠꦏꦁꦒꦼꦮꦫꦒꦢ꧀ꦒꦢ꧀ꦱꦸꦭ꧀ꦱꦏꦶꦁꦆꦤ꧀ꦝꦶꦪ꧈ꦭꦁꦏꦸꦁꦱꦮꦸꦭꦤ꧀꧈ꦲꦤꦔꦶꦁꦏꦸꦭꦮꦂꦒꦤꦶꦥꦸꦤ꧀ꦢꦺꦫꦺꦁꦲꦁꦱꦭ꧀ꦥꦮꦂꦠꦺꦴꦱ꧀ꦥꦸꦤꦥꦱꦩ꧀ꦥꦸꦤ꧀ꦧꦶꦝꦭ꧀ꦱꦏꦶꦁꦤꦒꦫꦶꦮꦭꦤ꧀ꦢꦶ꧉ꦱꦒꦼꦢ꧀ꦲꦸꦒꦶꦮꦁꦱꦸꦭ꧀ꦭꦶꦥꦸꦤ꧀ꦲꦔꦼꦤ꧀ꦠꦺꦴꦱ꧀ꦱꦶꦫꦩ꧀ꦥꦸꦁꦔꦶꦁꦥꦿꦏꦮꦶꦱ꧀ꦱꦶꦥꦸꦤ꧀ꦥꦫꦱꦼꦠꦸꦝꦺꦤ꧀ꦲꦶꦁꦏꦁꦢꦶꦥꦸꦤ꧀ꦕꦼꦥꦼꦁꦔꦶ꧉
꧋ꦱꦮꦼꦤꦺꦃꦲꦶꦁꦠꦶꦪꦁꦲꦺꦱ꧀ꦠꦿꦶꦧꦺꦴꦗꦺꦴꦤꦶꦁꦏꦗꦶꦲꦶꦁꦝꦼꦒꦠ꧀꧈ꦦꦸꦭꦸꦁꦱꦸꦔꦶ꧈ꦯꦸꦩꦠꦿ꧈ꦤꦭꦶꦏꦤꦸꦗꦸꦮꦺꦴꦤ꧀ꦠꦼꦤ꧀ꦲꦶꦁꦒꦿꦶꦪꦥꦶꦪꦩ꧀ꦧꦏ꧀ꦏꦤ꧀꧈ꦏꦠꦼꦩ꧀ꦥꦸꦃꦲꦶꦁꦢꦸꦂꦗꦤꦏꦺꦴꦪꦺꦴꦏ꧀꧉ꦱꦫꦺꦃꦤꦶꦁꦲꦺꦱ꧀ꦠꦿꦶ꧈ꦭꦗꦼꦁꦔꦼꦱꦿꦃꦲꦏꦼꦤ꧀ꦲꦂꦠ f 3.000꧉ꦱꦏꦶꦁꦧꦶꦔꦃꦲꦶꦥꦸꦤ꧀ꦥꦸꦤ꧀ꦏꦺꦕꦸꦧꦺꦴꦠꦼꦤ꧀ꦥꦽꦭꦸꦩꦶꦒꦸꦤꦏ꧀ꦲꦏꦼꦤ꧀ꦥꦶꦱ꧀ꦠꦸꦭ꧀ꦭꦶꦥꦸꦤ꧀꧉ꦱꦉꦁꦥꦫꦢꦸꦂꦗꦤꦩꦼꦁꦏꦼꦂꦧꦝꦼꦮꦁꦱꦸꦭ꧀꧈ꦲꦶꦁꦏꦁꦒꦝꦃꦒꦿꦶꦪꦏꦠꦸꦮꦸꦃꦲꦤ꧀ꦲꦏꦭ꧀꧈ꦏꦺꦕꦸꦭꦗꦼꦁꦢꦶꦥꦸꦤ꧀ꦱꦚ꧀ꦗꦠꦱꦏꦶꦁꦮꦶꦁꦏꦶꦁ꧈ꦢꦸꦂꦗꦤꦠꦶꦠꦶꦒꦱꦩꦶꦤꦤ꧀ꦝꦁꦠꦠꦸꦉꦏꦲꦺꦴꦱ꧀꧈ꦱꦲꦭꦗꦼꦁꦏꦕꦼꦥꦼꦁꦲꦶꦁꦥꦸꦭꦶꦱꦶ꧈ꦏꦥꦭꦤꦶꦥꦸꦤ꧀ꦠꦏ꧀ꦱꦶꦃꦢꦶꦥꦸꦤ꧀ꦲꦸꦥꦢꦺꦴꦱ꧀ꦱꦶ꧉
꧋ꦮꦺꦴꦤ꧀ꦠꦼꦤ꧀ꦮꦂꦠꦺꦴꦱ꧀꧈ꦧꦶꦭꦶꦃꦝꦼꦥꦂꦠꦼꦩꦺꦤ꧀ꦎꦤ꧀ꦢꦼꦂꦮꦶꦱ꧀ꦏꦒꦸꦔꦤ꧀ꦏꦂꦱꦧꦝꦼꦔꦼꦮꦃꦲꦶꦉꦥꦺꦴꦠ꧀ꦩꦸꦫꦶꦢ꧀ꦱꦼꦏꦺꦴꦭꦃꦲꦶꦁꦏꦁꦮꦸꦭꦤ꧀ꦤꦤ꧀꧈ꦏꦲꦼꦮꦃꦲꦤ꧀ꦤꦩꦸꦁꦱꦧꦼꦤ꧀ꦠꦶꦒꦁꦮꦸꦭꦤ꧀ꦱꦥꦶꦱꦤ꧀꧉ꦢꦺꦤꦺꦧꦶꦭꦶꦃꦮꦺꦴꦤ꧀ꦠꦼꦤ꧀ꦩꦸꦫꦶꦢ꧀ꦲꦶꦁꦏꦁꦩꦸꦤ꧀ꦢꦸꦂꦥꦔꦗꦂꦫꦤ꧀ꦤꦶꦥꦸꦤ꧀꧈ꦠꦶꦪꦁꦱꦼꦥꦸꦃꦲꦶꦥꦸꦤ꧀ꦭꦗꦼꦁꦧꦝꦼꦢꦶꦥꦸꦤ꧀ꦱꦸꦏꦤꦶꦱꦸꦩꦼꦉꦥ꧀꧉
꧋ꦏꦺꦴꦩꦶꦠꦼ Olympiade ꦧꦺꦴꦠꦼꦤ꧀ꦧꦝꦼꦔꦶꦤ꧀ꦠꦸꦤ꧀ꦤꦶꦠꦶꦪꦁꦲꦃꦭꦶꦱꦼꦥꦺꦴꦂꦠ꧀ꦠ꧀ꦝꦠꦼꦁ Olympische Spelen ꦲꦶꦁꦄꦩ꧀ꦱꦼꦠꦼꦂꦝꦩ꧀꧈ꦲꦶꦁꦏꦁꦧꦝꦼꦢꦶꦥꦸꦤ꧀ꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦱꦊꦧꦼꦠ꧀ꦠꦶꦥꦸꦤ꧀ꦠꦲꦸꦤ꧀ꦥꦸꦤꦶꦏ꧉ꦲꦮꦶꦠ꧀ꦧꦺꦴꦠꦼꦤ꧀ꦮꦺꦴꦤ꧀ꦠꦼꦤ꧀ꦠꦶꦪꦁꦲꦃꦭꦶꦱꦼꦥꦺꦴꦂꦠ꧀꧈ꦲꦶꦁꦏꦁꦏꦼꦔꦶꦁꦏꦠꦤ꧀ꦝꦶꦁꦔꦏꦼꦤ꧀ꦩꦿꦶꦏ꧈ꦠꦸꦮꦤ꧀ T. Keyzer ꦧꦺꦴꦠꦼꦤ꧀ꦱꦲꦺꦱ꧀ꦠꦸꦏꦲꦁꦏꦠ꧀ꦠꦏꦼꦤ꧀꧈ꦲꦩꦂꦒꦶꦤꦩꦸꦁꦲꦶꦗꦺꦤ꧀꧉
꧋ꦱꦫꦺꦃꦤꦶꦁꦏꦼꦉꦥ꧀ꦥꦶꦤꦁꦒꦶꦃꦏꦱꦁꦱꦂꦫꦤ꧀ꦲꦶꦁꦥꦥꦤ꧀ꦠꦼꦧꦶꦃ꧈ꦲꦶꦁꦏꦁꦏꦼꦢꦔꦺꦴꦤ꧀ꦔꦼꦤ꧀ꦠꦺꦴꦱ꧀ꦱꦶꦥꦶꦠꦸꦭꦸꦁꦔꦤ꧀ꦤꦶꦁꦝꦺꦴꦏ꧀ꦠꦼꦂ꧈ꦲꦸꦠꦮꦶꦏꦢꦔꦺꦴꦤ꧀ꦮꦺꦴꦤ꧀ꦠꦼꦤ꧀ꦩꦂꦒꦶꦤꦭꦶꦏꦧꦝꦼꦤꦼꦝꦥꦶꦠꦸꦭꦸꦁꦔꦤꦶꦁꦝꦺꦴꦏ꧀ꦠꦼꦂꦝꦠꦼꦁꦒꦿꦶꦪꦱꦏꦶꦠ꧀꧉ꦲꦶꦁꦱꦥꦸꦤꦶꦏꦠꦸꦮꦤ꧀ꦝꦺꦴꦏ꧀ꦠꦼꦂꦯꦸꦏꦶꦩꦤ꧀ꦲꦶꦁꦔꦪꦺꦴꦓꦾ꧈ꦏꦥꦉꦁꦩꦸꦭꦁꦝꦠꦼꦁꦱꦧꦼꦤ꧀ꦠꦶꦪꦁꦲꦸꦠꦮꦶꦩꦸꦫꦶꦢ꧀ꦩꦸꦫꦶꦢ꧀ꦱꦼꦏꦺꦴꦭꦃꦲꦶꦁꦧꦧ꧀ꦩꦼꦂꦧꦤ꧀꧈ꦮꦸꦭꦁꦔꦤ꧀ꦮꦲꦸꦏꦭꦫꦸꦩꦶꦪꦶꦤ꧀ꦤꦩꦸꦁꦠꦸꦩꦿꦥ꧀ꦥꦫꦥꦢ꧀ꦥꦶꦤ꧀ꦝꦼꦂ꧉ꦱꦥꦸꦤꦶꦏꦥꦩꦸꦭꦁꦔꦶꦥꦸꦤ꧀ꦱꦩꦶꦁꦒꦸꦏꦥꦶꦁꦏꦭꦶꦃ꧉
꧋ꦮꦺꦴꦤ꧀ꦠꦼꦤ꧀ꦥꦮꦂꦠꦺꦴꦱ꧀꧈ꦧꦶꦭꦶꦃꦠꦸꦱ꧀ꦭꦃꦱꦼꦥꦸꦂꦲꦺꦏ꧀ꦥꦿꦺꦱ꧀ꦧꦝꦼꦢꦶꦥꦸꦤ꧀ꦲꦺꦮꦃꦲꦶ꧈ꦤꦔꦶꦁꦠꦁꦒꦭ꧀ꦠꦸꦩꦥꦏ꧀ꦏꦶꦥꦸꦤ꧀ꦢꦺꦫꦺꦁꦏꦠꦩ꧀ꦠꦺꦴꦏ꧀ꦲꦏꦼꦤ꧀꧈ꦱꦧꦼꦤ꧀ 1 ꦢꦸꦩꦸꦒꦶ 60 K.M. kl. I f 1.- kl. II f 0.50 kl. III f 0.25
61 ꦢꦸꦩꦸꦒꦶ 100 K.M. kl. I f 1.50 - kl. II f 0.75 kl. III f 0.50
101 ꦢꦸꦩꦸꦒꦶ 150 K.M. kl. I f 1.- kl. II f 1.25 kl. III f 1.-
151 ꦢꦸꦩꦸꦒꦶ 200 K.M. kl. I f 2.50 - kl. II f 2.25 kl. III f 2.-
ꦭꦁꦏꦸꦁ 200 K.M. kl. I f 2.50 - kl. II f 2.50 kl. III f 2.50
꧋ꦥꦿꦤꦠꦤ꧀ꦮꦲꦸꦧꦝꦼꦠꦸꦩꦶꦤ꧀ꦢꦏ꧀ꦏꦁꦒꦼꦕꦺꦴꦧꦚ꧀ꦕꦺꦴꦧꦤ꧀꧈ꦢꦢꦺꦴꦱ꧀ꦧꦝꦼꦢꦶꦥꦸꦤ꧀ꦲꦤ꧀ꦠꦮꦶꦱ꧀ꦲꦏꦼꦤ꧀ꦧꦝꦼꦲꦶꦁꦥꦶꦏꦤ꧀ꦠꦸꦏ꧀ꦏꦶꦥꦸꦤ꧀꧈ꦩꦤꦮꦶꦱꦲꦼ꧈ꦧꦝꦼꦢꦶꦥꦸꦤ꧀ꦠꦼꦠꦼꦥ꧀ꦥꦏꦼꦤ꧀꧉
