“Domigdi an lumpia!”
Su gabós nagharágad nin lumpiá asin tuminukaw si Tadeo nasisinangan na marhay ta nakahaw-as sya sa sibot na kamugtakan.
Su plato na ipinánongod ki Padre Irene dai lominuwas na bantog asin mabangis na ipinaháyag ito ni Sandoval nin síring:
“!Nagkintab sa mantiká sa luwas asin orig sa laog! Darahon digdi su ikatolong plato, su torta nin mga fraile!”
Su torta dai pa nagigibo; nadadangog su sirísirí kan mantika sa sartèn. Inorawa ninda an pangyáring iniho sa paginom asin hinágad ninda na tumaram si Pecson.
Nangurus na gayo si Pecson, bominuhat na nagsákit makapógol kan saíyang sa mangmang na ngisi, asin sa pagárog sa sarong predicador na agustino bantog kaitong panahón, nagpoón nin pagsabi sa hababaon na tingog na baga naghihilwas kan tesis sarong sermon.
“Si tripa plena laudat Deum, tripa famelica laudabot fratres; kun an panong bitúka nagóomaw sa Dios, an bitúkang gutom magoonaw sa mga fraile. Mga tataramon na itinaram ni Ginoóng Custodio sa ngusó ni Ben Zayb, pahayagan El Grito de la Integridad, ikaduwang pasal, kamangmangan sanggatós limang polo may pito.”
“Mga namomotan kong mga tugang ni Jesucristo!” “Ihináhayop kan karat-an an saiyang maating hinángos sa mga hidyaw na mga gilid kan Frailandia, sa mga táwong hámak Kaporoan nin Filipinas! Daing minasígang aldaw na daing dumaging na sarong atake, na daing mádangog na paglanghad laban sa mga igagalang, sasambahon asin ibabalangíbog na mga corporacíon, dai makakapangalásag asin kúlang nin lubós na pangangátig. Togote ako nindo, mga túgang, na sa sarong hidelè magpani caballero andante ako tangáning magsorog sa maluya, sa mga banal na kaboronyogan na mga nagpalikhara satuya, na nagpaparígon ulí kan panghipnong kaisipan dapit sa arawígang, an bitukang pano nagoómaw sa Dios, na iyo an bitúkang gotom magoomaw sa mga fraile.”
“Madásig madásig!”
“Dangoga,” an sabing bulanos ni Isagani; “pinapatanidad taka na kun mga fraile an pagoorolayan, may saro akong iginagálang.”
