Pinagkaoroyonan na mantang si Sandoval iyo an orog na may kasipatan (372) bilang tagapagtalumpati, sya an magpadagos kan alap (373).
Hogakon, siring sa giraray, daing ano man na hinanda si Tadeo asin namugtak sa sarong sibot na kamugtakan. Kan sinosorop nya bilang an sarong halabang sotanghon, pinagiisip nya kun paano syang makaipsot sa siring na itong kamugtakan, kan magiromdoman nya su sarong talumpati na naokdan nya sa clase, asin naghandang arogon asin pagliwatliwaton ito.
“Mga minamahal kong mga tugang sa mokna!” nagpoon nin pagtaram na naglalamanong may kapot na duwang sipit na ginagamit kan mga intsik sa pagkaon.
“Hayop! botsani an sipit ta mararaot mo an sakong alapok!” olay nin saro nyang kataid.
“Inapod kan saindong pagpili sa pagpano kan lawongan (374) na nabayaan sa ... ” “Parahuwad!” sinaligbaton sya ni Sandoval; “an talumpati na iyan su sa presidente kan samuyang Liceo!”
“Inapod kan saindong pagpili,” nagpadagos si Tadeo na dai nasaringgawan, “sa pagpano kan lawongan na nabayaan sa sakong... isip (asin itinokdo su tulak) nin sarong tawo na maliwanag na gayo hull kan saiyang sa cristianong katokdoan asin huli kan saiyang mga naiisipan asin mga mokna magkakanigo na magkaigwa nin kadikit na giromdom, anong masasabi saindo nin sarong napupunaw na gayo huli ta dai namahaw?”
“!Komoa ka nin sarong liog, chicooo!” an sabi saiya nin sarong kataid na tinaohan sya nin sarong liog nin manok.
“Igwa nin sarong pinggan, mga ginoo, yaman nin sarong banwaan na ngunyan osipon na lamang asin dahelan nin pagbasangbasang kan daga, saen nagdorolok tanganing isaldok su saindang mga nagkakapurunaw na mga sandok an orog kadarakulang mga paslo sa mga solnopanon na mga rona nin kinaban...” itinokdo kan saiyang sipit si Sandoval na nagrarangot nin matagas na pakpak nin guna.
“Asin !mga sirangnon!” an simbag kan pinagpadamgohan na baga kuminurit nin matalidong kan kutsara tandang sakod kaito su gabos na mga nagkakaraon.
“!Daing halaga an mga pagsasaligbaton!”
“Hinahagad kong pataranwn ako!”
“Naghahagad ako nin patis!” an diigang ni Isagani.
