Si Sandoval na burat nagawit:
“!Sarong fraile, duwang fraile, tolong fraile sa corooooooo
An bunga iyo mansana kan sa saro lang na toroooo!”
“Paghinanyog kamo, mga tugang, salingoya nindo an saindong paghiling sa mga mabansay na aldaw kan saindong pagkaaki; hinguaha nindong ogidon an sa ngunyan asin ihapot nindo sa saindong sadiri an sa ngapit. Igwa kamong ano? Mga fraile, mga fraile asin mga fraile! Sarong fraile an minabonyag saindo, minakumpil, minadalaw sa paadalan kaiba an mamomoton na pagmawot; sarong fraile naghihimate kan saindong mga enot na tagong-hilom, iyo an enot na minagibo saindong kumaon sa sarong Dios, an minabugtak saindo sa dalan nin kabuhayan; mga fraile an saindong mga enot asin huring mga paratokdo, fraile an minabukas kan puso kan saindong mga katipan na itinatalaga an mga iyan sa saindong mga hagahay, fraile an minakasal saindo, minapalakbay saindo sa manlaenlaen na puro sa pagtamo saindo nin pagliwat nin iklim asin mga kaalingan; tinatabangan kamo nya sa saindong paghingagdan asin minsan sumakat kamo sa bitayan, yaon an fraile sa pagiba saindo kan saiyang mga pamibi asin mga luha asin tumiwasay kamo ta dai kamo babayaan, sagkod na dai kamo makitang gadan nang gayo asin mga binirilingan. Alagad an saiyang pagkamoot dai minatapus diyan: garadan na kamo hihinguahon nya na maogmang marhay an lobong saindo, asin makikibaka sya tanganing iagi sa simbahan an saindong bangkay, magkamit kan mga pamibi sa gadan asin mapahingalo sana napupuwas kun ikabugtak na kamo sa kamot kan Kaglalang mga lininigan na digdi sa ibabaw nin daga, salamat sa mga padusa sa kinaban na ini, mga pasakit asin mga kasopganan. Mga nakakabatid kan katokdoan ni Cristo na minapinto kan langit sa mga mayaman, sinda, mga bagong paratubos, mga tunay na kasalihid kan Paraligtas, minatorogdas kan gabos na panglilinglang, tanganing mahinggaanan kamo sa saindong mga sala, na inaapod kan tawo cuapi, asin dinadara an mga iyan sa harayo, harayong marhay, duman sa pinagoontokan kan mga kondenadong intsik asin kan mga protestante, asin binabayaan an angkasang iniho malinig, dalisay, maginhawa, mala ngani ta minsan pa muyahon nyato ngapit dai kitang makakatuklas nin minsan sarong sikapat na su-
