230
Quoi via tous les cancan d’la A’maine
miawit si Gertrude, usa ka babaye nga ambungan, nga mipasigpat nga mahagiton sa Kapitan Heneral.
— Ipagula ang can-can, misulti si Tadiyo, nga maoy nakadawat sa unang ganti sa pinaransis sa iyang klasi, sa pagkadungog niya ning pulonga. Makaraig, mosayaw silag cancan ...
Ug dayon kuso-kuso nga malipayon sa iyang mga kamut.
Apan si Tadiyo, sukad sa pagsugod sa dula, wala magkabana sa honi. Gipangita niya ang mahilas, ang malaw-ay, ang eskandalo... ang kahilas sa mga lihok ug ang kanipis sa mga sapot... ug kay makasabut man siyag diyutay nga pranses, gipamati gayud niya pag-ayo ang mga sulti, basin pag makadungog siya sa mga mahilas nga sinultihan, nga maoy gipatuhoan sa mga nagbalantay sa kadungganan sa Yutang Natawhan.
Si Sandobal, nga nagpakaantigo sa sinultihang pranses, nahimong maghuhubad sa iyang mga higala. Parehas da silag hibaloan si Tadiyo, apan nakatabang kaayo kaniya ang kaagi sa dula nga namantala sa mga mantalaan ug uban iya na lamang mina-mao-mao.
— Oo, matud niya, mosayaw silag cancan, ug kanang babayhana mao ang mangulo.
Si Makaraig ug si Pecson namati pag-ayo ug daan nang nagpahiyum. Si Isagani mitan-aw sa laing dapit, naulaw nga si Paulita motan-aw niadtong talan-awona, ug nakahunahuna sa paghagit ug away kang Juanito Pelaez sa sunod nga adlaw.
Apan nakawang lamang ang paghulat sa atong mga batanon. Migula si Serpolette, usa ka babayeng matahum, nga nagkalo ug panapton, makabihag ug mahagiton ang panagway:
Hein que parle de Serpolette?
nangotana sa mga tabi-an, linulho ang mga bukton ug mao rag makig-away. Usa ka ginoo mipakpak ug unya misunod kaniya ang mga naglingkod sa butaka. Si Serpolette, sa walay pagbiya sa iyang pamayhon nga maugdang, mipasigpat sa mipakpak pag-una ug gibayran kini sa usa ka pahiyum nga nakapakita sa mga gagmay nga ngipon, nga maingoningon sa usa ka kuwintas nga mutya sinulod sa usa ka tipiganan nga tersipilong pula. Si Tadiyo misagnunot sa pagtan-aw, ug na-
