229
sa Heneral. Ang iyang mata didto lamang sa tabil, diin may gipintal nga usa ka sulod sa balay nga gibitayan mga matahum nga kortina nga mapula ug nga nagtambo sa usa ka tanaman diin makita ang nagsidlit nga tubig sa taliwala. Pagkamingaw alang kaniya sa pinintal sa tabil ug pagkamasulob-on sa tanan....Usa ka libo ka mga handumanan mitungha sa iyang panumduman sama sa usa ka honi nga layo kaayo sa taliwala sa kagabhion, sama sa mga laylay sa pagkabata, mga hinaganas sa mga kalasangan nga nag-inusara, mga dahunog sa mga sapa, mga gabiing bulanon sa daplin sa baybayon nga walay kinutuban... Ug mabination nga batan-on, nga nagtoo nga siya alaut na uyamut, mihangad sa atop aron ang mga luha dili modaligdig sa iyang mga mata.
Usa ka masipa nga pakpak nakapukaw kaniya sa iyang pagpalandong.
Ang tabil gibuksan na, ug ang malipayon nga koro sa mga mag-ooma ni Corneville mipakita sa iyang mga mata, nagkalo sa ilang mga kalo nga panapton ug nagsul-ob sa ilang mga tiil mga bug-at nga bakya nga kahoy. Ang mga babayc, unom kun pito sila, nga maayog pagkapintal ang mga aping ug mga ngabil, nga binutangag mga malingen nga badlis ang mga mata, aron pagdugang sa ilang kasilaw, nagpasundayag sa ilang mga tambokon ug puti nga mga bukton, mga tudlo nga puno sa brilyanti ug mga bitiis mga lingin ug maayong pagkalalik. Ug samtang nag-awit sa pinaransis nga allex, marchez, allez, marchez, nagpangidhat sa ilang mga higala nga naglingkod sa butaka, sa dakung kahilas, nga si Don Custodio, human motan-aw sa palko ni Pipay, aron sa pagpaniid kon kini wala ba usab magpahiyum sa laing maghahalad, misulat sa iyang kartira sa usa ka pahinumdum sa iyang nakita, ug aron gayud siya matino pag-ayo, giduko ang iyang ulo, aron pagtan-aw kon ang mga magdudula wala ba magpakita sa ilang mga paa.
— Ay, kining mga pransiyanhong babaye, nanghupaw siya, samtang ang iyang hunahuna gilingaw niya sa laing mga butang nga mapuslanon ug naghimo siyag mga tandi-tandi ug mga panlantaw.
