196
Ug nanaug dayon.
— Ania na ang polbora? nangotana si Simoun.
— Sinulod sa mga sako; naghulat ako sa mga bala...
— Ug ang mga bomba?
— Andam na.
— Maayo, “maestro” ... Karon dayong gabii mogikan ka ug sultihan mo ang tinyinti ug ang kabi... ug unya mopadayon ka sa imong paglakaw; Sa Lamayan makita mo ang usa ka tawo nga magsakay sa usai ka bangka; ingnon mo siya ...
“Kabesa,” ug siya motubag nga “Tales.” Kinahanglan gayud nga ania siya dinhi ugma. Dili kita mag-usik sa panahon. Ug gilayon gitagaan niyag salapi nga bulawan.
— Ngano, ginoo, nangotana ang tawo sa usa ka kinatsila nga larino; adunay mga bag-ong hitabo?
— Oo, buhaton sulod sa sunod nga semana.
— Sa semanang umaabut, misanong ang tawo nga nagsibug; ang mga balangay wala pa makaandam; maghulat sila sa Heneral nga isibug niya ang iyang kasugoan... ako nagtoo nga hulaton ta pa nga magsugod ang kuwaresma...
Si Simoun milingolingo.
— Wala kita magkinahanglan sa mga balangay, mitubag siya; igo na kaayo ang mga tawo ni Kabesang Tales, ang mga kanhi karabiniro ug ang usa ka rehimiyento sa mga sundalo. Kon dugayon pa nato, tingali patay na si Maria Clara. Karonkaron, gikan dayon.
Ang tawo nawala.
Si Placido nakasaksi niadtong hamubong panagsulti ug nakadungog sa tanan; sa diha nga nakasabut na siya sa gikasultihan, nanlimbawot ang iyang balhibo ug mitan-aw siya kang Simoun nga nanlurat ang mga mata sa kakulba. Si Simoun igo lamang nga mipahiyum.
— Nahibulong ka, misulti si Simoun nga nagpahiyum sa iyang pahiyum nga mabugnaw, nga usa ka indiyo nga bulingit makasulti pag-ayo sa kinatsila? Siya magtutoon kaniadto sa eskuwelahan, nga nanlimbasog sa pagtudlog kinatsila sa mga bata ug diha na mohunong sa gipagula na sa katungdanan ug gihinginlan sa laing yuta, kay usa ka kono ka manggugubot ug higala sa alaut nga Ibarra. Ako siyang gikuha sa dapit diin siya hinginli, diin nahimo siyang manananggot ug gihimo ko siya nga mamumuhat sa polbora.
