195
Sa usa ka balay gitogtog ang mga Valz, ug makita ang mga pareha nga nagsayaw iniwagan sa mga suga sa kinke ug mga parol... pagkakabus nga talan-awona nga itandi sa talan-awon nga makita sa kadalanan. Ug, binutang gihapon ang hunahuna sa Hongkong, nangotana siya sa iyang kaugalingon kon ang mga gabiing bulanon didto maanindot ba gihapon, mga matahum ba, sama sa Pilipinas, ug unya usa ka mabangis nga kagool mitungha sa iyang kasingkasing.
Gipahunong ni Simoun ang sakyanan ug silang duha nanganaog. Niadtong higayona nangagi dool kaniya si Isagani ug Paulita, nga naghinunghungay ug mga matam-is nga pulong sa gugma; nagsunod kanila si Dona Victorina ug si Juanito Pelaez, nga nagyawyaw sa hataas nga tingog, nangompas ug milabi pagka boktot. Si Pelaez, nga nalingaw, wala makaalinggat sa iyang kauban sa eskuelahan kanhi.
— Kana hinoon siya maoy malipayon, nagbagolbol si Placido, dungan ang panghupaw, nga nagtan-aw sa pundok nga nagkalayo ug mao na lamay makita ang bukton ni Juanito nga mosaka na man, mopaubos na man, sama sa pako sa usa ka palabad.
— Anha da gayud siya kutob, mibagolbol si Simoun; anha da gayud diha ang mga kabataan...
Kinsay ilang giigo sa ilang sulti ni Placido ug Simoun? Kini misinyas sa batan-on, mibulag sila sa dalan ug nanulod sa usa ka agianan nga nagsubay sa mga latayan nga nag sumpay sa mga balay; usahay manglukso sila sa bato, aron dili makatunob sa lapok; usahay mangubo aron sa pagsu-ong sa usa ka siklat nga dili maayong pagkabuhat ug labing dautan nga pagkabantay. Nahibulong si Placido nga ang adunahan nga alahero magasubaysubay niadtong mga dapita ingon sa anad na siya kaayo. Sa katapusan miabut sila sa usa ka lagwerta, diin makita ang usa ka balay nga guba nga nag-inusara, linibutan sa mga sagingan ug mga ponoan sa bonga. Tungod kay nakita man niya ang pila ka bayanan nga kawayan ug mga piraso nga tubo nga binuhat gihapon sa kawayan, nakahunahuna si Placido nga kadto maoy balay sa usa ka mamumuhat sa mga kastilyo ug mga pabuto.
Gitoktok ni Simoun ang bintana. Usa ka tawo mitambo.
— Ah, ginoo ...
