193
Ug sanglit ang iyang inahan nagsugod na man usab sa iyang wali mahitungod sa pailub ug sa paubos, si Placido, bisan wala pa makakaon, mibalik paglakat padulong sa mulye nga dunggoanan sa mga bapor.
Sa pagkakita niya sa usa ka bapor nga nagbitad na sa sinipit aron paggikan padulong sa Hongkong, usa ka hunahuna misantop kaniya: moadto siya sa Hongkong, mokagyo siya, aron siya mahimong adunahan didto ug makahimo sa pagpakiggubat sa mga prayle. Ang hunahuna sa Hongkong nakapahinumdum kaniya sa usa ka kaagi sa mga sirialis, mga kandelabro nga pulos sapi nga gihatag sa pila ka molopyo sa usa ka simbahan; ang mga prayle, matud pa sa usa ka platero, nagpabuhat gilayon sa Hongkong ug mga siryalis ug mga kandelabro nga parehas, apan dili lunsay nga salapi, kon dili sinunod lamang, ug unya kining tanan giilis nila niadtong binuhat sa lunsay nga salapi. Ug dayon kini ilang gipatunaw ug gipabuhat ug salaping Mek. Mao kini ang sugilanon nga iyang hidunggan, ug bisan sugilanon lamang kaha, apan tungod sa iyang kalagot iyang gituhoan nga tinuod. Ang tinguha sa pagpuyo nga gawas ug pila pa ka hunahuna nga misakdop sa iyang panumduman maoy nakatukmod kaniya sa pag-adto sa Hongkong. Kon adto didto dad-a sa mga kaponongan ug mahimo siya nga adunahan.
— Buot ako mopuyo nga gawas, ug walay agalon... Hiabtan siya sa kagabhion nga naglaroylaroy sa San Fernando, ug kay wala man siya makasugat ug usa ka marino nga higala niya mipauli siya. Ug kay ang gabii maanindot man kaayo ug ang Bulan nga nagsubang sa kalangitan nakahimo man sa mahugawng siyudad nga usa ka gingharian sa mga manulonda, mipadulong siya sa Perya. Ug sa didto na siya sa sulod, nagbalikbalik siya sa iyang agi, gisuroy niya ang mga tindahan sa walay pagtagad sa ilang mga baligya, ug ang iyang hunahuna didto gihapon sa Hongkong aron siya mahimong usa ka tawong gawas ug maadunahan ... Mobiya na unta siya sa Perya, apan nakakita siya kang Simoun nga nanamilit sa usa ka langyaw ug silang duha nagsulti sa ininglis. Alang kang Placido, ang tanang sinultihan nga gigamit sa mga uropanhon dinhi sa Pilipinas, nga dili kinatsila, ininglis gayud. Ug unya nadungog pa niya ang pulong nga Hongkong.
