167
tingog madanihon, ang iyang pagyukbo gipalabihan pag-ayo apan ang alahero miputol sa sulti sa insik ug nangotana sa kalit:
— Ning angay ba sa mga pulsiras?
Ning pangotana nawala ang kasayag sa nawong ni Kiroga, sama sa usa ka damgo; ang paningog nga madanihon, nahimong basag, pipiko pag-ayo ang iyang hawak, ug ang iyang mga kamut gipataas sa iyang nawong, nga maoy usa ka pagyukbo nga ininsik, ug mibakho:
— Uy, Ginoo Simoun, ako kana pildi, ako kana hapay . . .
— Unsa, insik Kiroga, nahapay ka ug napildi? ug kining daghang mga botilya sa champagne ug kining daghang mga dinapit?
Si Kiroga mipiyong sa mata ug mikusmod. Ho! ang Kombira niadtong hapona ug ang nahitabo sa mga pulsiras, nakahapay kaniya. Si Simoun mipahiyum lamang. Kon ang usa ka magpapatigayong insik magmulo gani, kana nagpaila nga maayo ang lakat sa iyang patigayon; apan kon moingon siya nga maayog lakat ang iyang patigayon, kana nagpaila nga siya hapit na mahapay ug hapit na mokagyo sa iyang lungsod.
— Ikaw, wala hibalo ako kana pildi, ako kana Hapay? Ay, Sino Simoun, miya hapay . . .
Ug ang insik, aron hisabtan pag-ayo ang iyang kakahimtang, gipanuntan ang pulong hapay sa paghana sa pagkapukan.
Si Simoun kakataw-on kaayo, apan nagpugong ug miingon nga wala siyay kalibutan sa tanan.
Gidala ni Kiroga si Simoun sa iyang higdaanan, gisirhan ang pultahan niini ug dayong asoy sa iyang kagool..
Ang tulo ka mga pulsiras nga iyang gipangayo kang Simoun aron ipakita sa usa ka ginang, dili alang niini, nga maoy usa ka inahana kanunay lamang galuob sa iyang lawak, sama usa ka babayeng insik, kon dili alang sa usa ka maanyag ug makabibihag nga babaye, higala sa usa ka tawong halangdon, kansang pagtabang iyang gikinahanglan alang sa usa ka patigayon diin makaganansiyag unom ka libo ka pisos. Ug unya, sanglit ang insik wala may kalibutan kon unsay angay ihatag sa usa ka babaye nga kusog mamostura, nangayo sa alahiro ug tulo ka maanindot pulsiras, ang labing maanindot niya, nga matag usa mobili gikan sa tulo hangtud sa upat ka libo ka pisos. Ang insik, nagpaka-
