152
gikinahanglan sa nabantug ng konsehal. Si Juanito Pelaez, nga higala usab sa baylarina, mitanyag nga siya maoy mosulti niini, apan si Isagani milingolingo ug miingon nga igo na kaayo nga midangop na sila kang Pipay.
— Tan-awon ta ang laing paagi..
— Ang usa ka paagi mao ang pag-adto sa manlalaban nga magtatambag ni Don Custodio, nga si G. Pasta, ang orakulo nga kang kinsang atubangan si Don Custodio, dili molalis.
— Kana maoy labing maayo, miingon si Isagani; si G. Pasta maoy usa ka pilipinhon, ug nakauban sa klasi sa akong oyoan. Apan, unsaon pagdool niini?
— Anaa diha ang quid, mitubag si Makaraig, nga mitutok kang Isagani; si G. Pasta adunay usa ka baylarina . . . dili diay, usa ka mamumolda . . .
Si Isagani mibalik paglingolingo sa ulo. — Ayaw gani diha pagsantolon kaayo, giingon siya ni Pelaez; ang tinguha makaluwas sa mga paagi. Ako nakaila sa mamumolda, si Matea, adunay boldahanan diin nagtrabajo ang daghang mga dalaga . . .
— Dili, mga ginoo, misagbat si Isagani; unahon ta paggamit ang mga paagi nga tarong . . . Moadto ako sa balay ni G. Pasta ug unya kon wala akoy mahimo, mahimo, na ninyo pagdool sa mga baylarina ug mga mamumolda.
Miuyon ang tanan, ug gikasabutan nga si Isagani mosulti niadtong adlawa dayon kang G. Pasta, ug inigkahapon mohatag siyag kasayuran sa iyang nahimo sa iyang nahimo sa iyang mga kauban sa Unibersidad.
