Nen onggagapo lay repike ray kampana ya mangipakabat na misay pegley lábi, tan saramay totoon lablabay dani onogip nen say anggan antotan a pispista tan dadagoan ed simbaan et aliing iran nguronguró ed onman lan tanol tan sayaksak, si Basilio balet inmakseb ed abong ya ag impalikas, linmikod duara ono taloran lansangan, tan nen sigsiguro lan anggapoy ontotumbok may mangiimanod sikato, pinili to ramay dalan a matalag a nababakatan a mamaarap ed samay takel na boleg day lbarra nen saman, ya asaliw nen Kápitan Tiago nen say Uley et kinonpiska toray bienes da ya inlalako.
Lapod say abanaay Pasko ed saman a taon et melag lay bulan, mapalaloy bilunget ed saman a pasen. Tinmonda lamay repike tan sa labat lay alingag so atilak nin narerengel ed onman lan kareenay lábi ya milmila rad esaes day manbanyawes a sangan nasisiplog na dagem tan say marandanet a tanol day daluyon ya onsisikdak dimad gilig na kaabay a libsong, ya aliling toy mabiskeg a sanggouk na talbay pinalsa ed kaitlekay ugip da.
Saman a pasen tan bekta pansasaponen dad pagew toy liknaan iran ag nabaliksanan; manaakar a tewek a singa to bilang labay a talusey matá may kabilungetan. Ontangay a tonggal paminsan a pannengneng toran may bitewen a nataktakiling ed nansesengatay toktok daran may kakiyewan, insan to ituloy so panaakar to ya ipalpaliis tod dadalanen to ramay kiew iran ankelag tan lalaklaknaten to ramay wakawakal a makakasbel na kurang to. No arum, pawilen to may nanlapoan to la, no maminsan nasagor ono nakalotay sali toy wakal, odino nagapol ed sakey a lamot ya akapaway ono sengeg na kiew ya atumbá. Kayari kapalduay oras a panaakar to asabi toy melag a kulos a diad biek a gilig to et walay pokdol ya andekereket
a say pakanengneng ed onman lan bilunget et balbaleg a singa
