Si Basilio aliwan say maruksa, no ag ta lapod mabetbet nen Kpn. Tiagon panpasnokan, ibábales to met no arum ed saramay walad silong na pakauley to. Samay masiken nannunot na balon balitan nibaga to.
"¡Inatey so sakey ed saray mangakanon na dálin, samay masiken a mangaasikason may takel, tan si kúra agto inabuloy ya itday ponpon na duká ta lapo konod mayaman so amo to."
"Antoy inateyan to ey?"
"Kamamasiken!"
"Anto, ompatey ed kamamasiken? Maong laingen komon no inatey ed sakit!"
Diad gaway pilit nen Basilión manlabak na inaatey a mannengneng na akasengeg na inateyan da, say labay ton pateyan day totoo sakit.
"Anggapoy balon nibaga yod siak? Nanaekal so ganas kon mangan ed pakakangel koy apasakey. Antoy nangelan yon nipaakar ed Sagpang ey?"
Tinungtong nen masiken so impakarel day tutulisan ed kinen Anakbanwan Tales. Ag inmesel si Basilio ya ameneng. Nakal a tuan aminpinsay ganas ton mangan.
