Tan tinungtong toy inkatambal na deral na eges to nen binasaan toy puseg toy agua bendita ya bansag na impandasal toy Sanctus Deus tan babangatan to ramay wadman a mandengdengel ed gaween da no nadisenteria ra, nasibok ira, odino walay salot, salambengat ta nakaukolan ed satan a dásalen ed kastila so:
- "Santo Dios
- Santo fuerte
- Santo inmortal
- Líbranos Señor de la peste
- Y de todo mal."
"Anggapoy kasasapo to nian polaing, balet ta nakaukolan a basaay agua bendita may pasen ya ansakit odino kawalaay sakit." kuanto.
Dakel balet ed saray totooy ag manisiad saraya, ni ipapasen day inkipangaw nen Basilio ya dusay Dios. Ag ira met manigsisiad ni yalsan sungpad Uley, ni paspaskin, ta kabat da lan sipor so ugáli nen Basilion sankareenan tan mapasakbay, kanian ipapasen day inkipangaw to ya mauges a kababáles day papári nisesengeg ed impanundon tod Julí ed inkipaunong to, anta anak na tulisan, a malet nimet a kabusol na sakey a makapan yarin Togiop na papári. Tan manlapod abebbebay pangipapásenan dad kaptekay panagnunot may kagagawa ton man Togiop tan ag da nira alingoanay maruksa ran kababáles dad agew iran linmabas, sikato la may inisip dan sankasinggeran a nayarin agawa.
"Susto met so impamaekal ko lad abong ko!" kuanen hermana Penchang; "agko labay so makapiirangan ed saray papári. kanian inapurak lan impananap na kuarta."
Say katuaan so niliklikna toy inkarundon nen Julí, ta saya sikatoy manusumpal na darasalen to ra, yaayunoan to, tan no abaybáyag nin nanayam ed sikato komon asabisabi angankon sikato met lay panggaween toy panagpenitensia to. Ta akin a, no saray kúra et nayarian da itayon idasalan, tan inatey si Kristo lapod saray kasalanan tayo, ag met sirin nayari ya sandian nen Juli hermana Penchang?
Nen akasabí ra man a balbalita ed alulong a panaáyaman nen masegsegang a Julí tan si láki to, akaukolan ya amidua ran inúlit ed sikato. Sankanengneng to kalamor si hermana Balí ta sikatoy angipasabid sikatoy balita, ya singa agto natatalusan,
