Binmawag ya agangganod luyag so impatey nen Kápitan Tiago tan say inkipangaw nen Basilio, tan diad galang day yanoyanon mibabáley na San Diego ibagá mi dia ya mas so impanlikna rad sayay unor, tan bukor to labat wari sasalitaen da. Tan unong na gendat a nagagawa no walaray onian balita. nanbulong, nansangá, nambabangil a nipanon makaparpaermen tan mapakakebiew, sakey tan sakey angipaliwaway makilot ya ag natalusan, pinapanopanoan da ray kakulangan na isisipen dan nayarin agawa, apanmaliw da la rayan togtúa, tan say apalesá ran aniani ontan lan makapataktakut ya akebiew ton pati saramay dílin akanggawa.
Say dengeldengel ed báley na Tiani so sankalemewan lan dusá toy ipaalis, tan asingsingger a nayarin pateyen dan legay pangibaroy dad sikato. Saramay payakot tan ambilunget a panagnunot kulang dani ya, tan say sasalitaen da saray bitáyan tan panangukom a masiglat tan andi salaysayan; kukuanda ta say bulay Enero mauges a bulan, ta Enero may inkagawad Kavite, ya saraman1 anta papári lara, nilipit nira; kaniantin no nipaakar ed sakey a masegsegang a Basilio ya anggapoy manasayakop ed sikato tan kakaaro toran makatulong....
"Ibabagak lad sikato et!" kuanen Juez de Paz ya inngeswá, ya singa bilang walay impakasimbawa tod Basilio; "ibabagak lan sipor ed sikato....."
"Sankanengneng lan sikatoy nasumpalan to!" kuan met nen Hermana Penchang ya intuloy; "no ontubong ed simbaan et nanengneng ton makilot na daiset so agua bendita agtola idenet so lima ton mangariáma! Say lawas ton pisalita saray ayayep ya angkelag tan sakisakit, kanian dusay Dios itan! Sikatoy kanepegan ton sabien! Singa saman bilang so makapangialis na sakit so agua bendita! Makatambal ni ingen! Pui!"
_______________
1 Saray taloran papárin pilipino, Burgos, Gomez tan Zamora ya apakasalananay impibibiang ed rebulusion na 1872 tan atutolan iran nilipit.
