Sinmuko lay Kápitan Basilio; talagan saraman a tubonbalo imparaan da lan amin.
"No tungtongey tua," kuanton sinintak toy abala to; "aliwan makapoy a kanunotan, tan no ag naaral so latin, maong labat lay pakaamtay kastila. Nitay pakanengnengan yo, buloy. na pakapatnagan na panpapasuner tayo. Nen panaon mi manaaral kami latin ta saray libro mi insulat irad latin; natan aaralen yoy daiset balet ta anggapo ray libro yon latín, saray libron ikakana yo insulat irad kastila, balet ta agda ibabangat ed sikayo yan salita: aetas parentum pejor avis tulit nos nequiores1 ya unong na kuanen Horacio.2
Tan kayari to yan imbaga inmarawi lan mamaspaso ya singa sakey ya Emperador ed Roma. Akaimis iramay duaran tubonbalo.
"Sarayay totoon daan;" kuay Isagani," walanwalay naalmo ran makasbel ed antoman a pamaakaran; no walay iparungtal mod sikara, agda nanengneng so kaabigan, say naalmo ran tampol saray kakapuyan. Say labay da amin onsabid sikaran malimlimgas a masilesileng a singa bolay billar."
"Mantuntono ra balet nen pangamaen mo," kuanen Basilio; "anggapo lay totungtongen da say panaon iran linmabas, saray bilabilay da nen sáman..... Mayaka pa balet, antoy kuanen pangamaen mon nipaakar ed kinen Paulita ey?"
Binmalangay lupa nen Isagani.
"Sinirmonan daak nipaakar ed panatnili asawa..... Inebatan kon diad Ibale anggapo lay miparad sikato..... malimgas. maong a inkabangat, ulí la....."
"Sankayamanan, maong a mangawes, magrasia, ya anggapoy kakapuyan to likod labat lay panginaen ton makapalpalek," kuanen Basilion intuloy, a manelek.
Inelek met nen Isagani.
"Nipapaakar ed kinen panginaen, akaramdamag ka lan inbilin ton anapen koy asawa to?"
"Si Donya Victorina? Insipan mo anganko ta piano agto ka paisiyan ed kinen kaaroan mo, anto?"
"Talaga! Sa balet so kuestion ditan ta say inamotan nen asawa to.....diad abong nen pangamaen ko!"
__________________
1 Say panaon day atateng aliling toy mauges a manok ya angitarok na lalon mauges iran nambabangil.
2 Sakey a balitadon omaanlong ed latin.
