Ah! no makakar ka labat diman ya anggano maminpinsan, no
saray salim komon et nabatak da labat iraman a daladalan, no
nidenet mo labat so sampot day gamet mo ed samay kulos a
nakipaykipay moy danum to, no limgisen mo may dayat, onyurong kad mad bato tan napaanieweng moy dagem na masamsamit iran kansion mo, samay takel ko manmaliw a paraiso,
mangankanta ray binel ton may kulos, manesesiab iray bulobulong, manmaliw iran briliante terter na linaew, tan perlas so
panmaliwan day burá ton may dayat!"
Anggapo ta si Paulita balet nangelan to la ya diad yakar ed báley nen Isagani nakaukolan so ombaliksat irad palandey ya kawalaay mapalet iran ankelag a linta, tan sa labat lay pakanunot tod saya ta matakot, manbeggas lay bagó ton mankigtot. Sikato ta pasal toy inawa tan nalalamlaman, kuanton inmebat ta agto labay so manbaroy no ag manluganan odino man tren.
Si Isagani ta alingoanan to la ramay ambilunget iran kanunotan to tan iner may pangilingayan toray matá to et singa karosasan ya andi sabit so nanenengneng to, oniay inebato: "Agka mapaga, ta ag mabayag, manbabanlangan lad sarayan kapoloan so riles na tren,
- Ya dalanen dan marlás
- A singara mantekiab
- Na tren iran lúganan
- A maplés ya manlabás,
ya unong na inkuay sakey; diad satan amin iray sankarakpan a sukosukong da ra nian kapoloan magmainomay la ran sabien.....
"Kapigan ni balet ey? Naani no akulaw ak la....."
"Agka mapága! agmo amta no antoy nagawaan tayod loob na pigay taon," kuay ebat nen Isagani; "agmo amta labat so biskeg tan dalang na linawan naliliing ed bansa kalabas na malet a ugip ed lasus lasus taon..... Ag itayo papauliay España; saray tubonbalo tayo ran walad Madrid mankikimey iran lábi agew, tan isasaklang dad dálin dan nianakan so amin a tudioy pakatalus da, amin ya oras da, amin ya sagsagpot tan nagawaan da; dakel man irad may gampi ed sikatayo, politiko ran natalusan dan petepeteg ya anggapo lay mas maong a manipkel ed totoo nen say panpaparay kaabigan tan liknaan; agda igigimor ed sikatayoy kaptekan, tan diad saya singa tila sanka-
