ta say pasal ton lanang a narerengel et say panamauges ed dálin
ton nianakan, a mibabáli ni ingen no arum a manpauges, impatnag ton makakaimon a singa ngola makababarong.
Apalinak nen Isagani balet a tampol so kanunotan to.
"Tua," kuanto "sankainaroan ko la nen agtaka ni anengneng. Labalabay koy manligawligaw dimad makdel a takel, unogip cd sirom day kakiyewan, onyurong ed tuktok na sakey a baton baleg a pakanengnengan koy maawang a dayat na Pacífico ya mandaldaluyon ed petek koy danum ton inanagan, a singa to itatarok ya isasabid siak so anyeweng daran may kansion diman ed baybay na bansay América ya manbíbilay ed kawayangan....Nen agtaka ni anengneng, wadmad saman dayat so amin a bilay ko, liket ko, arok, tan saray pikugip na kaisipan ko. No naugip a mareereen insan marmarlang so agew ed katawenan, nalíliketan ak ya osusdongan koy anggad dalem na danum, a sakey a limamplon metroy kaabeba tod panyoryurongan kon bató, ya manaanap ak na munanakap dimad utel day tinmakel a rosas na bató tan koralis a napaaninagan kod man ed dalem na malinlinew ya inanagan a danum, ono saray ankakabaleg iran uleg ya unong na tungtong day taga uma et ontataynan irad takel ya onla ran manayam ed dayat a diman ira mansalat na itsura ra tan manmaliw iran makapataktakot..... No ontan lan ngarem a kuandan ipapaway daray inkantadad dalem na dayat, tomakiling ak a mansisiim ed sikara ed nanlalaetan day daluyon, ya ontan lay seet ko ya aminsan et singa anengneng korad utel day burakan a manggagalaw; nangel kon malinlinew so kansion da, kansion iran nipaakar ed kawayangan, tan naamingaw ko met so makaayayap iran tanol na arpa ra. Nen saman nayarian koy manpalabas na andukey iran oras ya imimanoen koray lurem a mansasalat so itsura ra, odino sakey a kiew a begtebegtew ed mapatar a dalin ono sakey a baton baleg, ya agko amtay makasengeg no akin, tan agko nibagan petepeteg so liknaan iran liliingen dad pagew ko. Di pangamaen ko mabetbet daak a sirmonay andukerukey tan diad paga ran nasakitan ak a manmaliw ak a namemeneng labay daak a yakar ya ipanengneng ed doktor. Balet ta anengneng ta ka, naaro taka, tan sayan linmabas ya impanbakasion ko singa walay kulang ya agko naalmod man, samay takel singa ambilbilunget, marmaermen imay ilog ya onaagos ed utel to, apasakey imay dayat, anggapoy karakpay nanenengneng.....
