pisos.....et antoy kuanmo no ibagak ed sikan wala ni utang
tod siak ya apat pisos, limaran real tan labinduan cuartos ey?
Ta panon ta siriy paningil ed toon mayaman a singa sikato a?"
"Walay utang tod sikayo tan a too?"
"Onaa! Sinambot kod inkaseldet toy sakey ya agew, nanunotan ko nin anggad natan, viernes, a las siete y mediay kabuasan, ya agak ni nimet nanaimosal..... Satay sinyoran tumtumbokey sakey ya akulaw ay, sikatotay nibantog a Pepay a bailarina..... agla onsasayaw natan ta sinebelay sakey a lakin maong a katoliko tan kaarok met a maong.....Nimay damalén a Z, anggapoy duarúak a tutumboken toy Pepay ta labay to lamet angankon kuyongen ya ompawil ya onsayaw. Maong a too, kaarok a maong; saksakey labat so kakabosan to: anta mestisoy intsik ipasouton kastilan nanlapod España. Sst.....! Nengneng moy Ben Zayb, satay singa lupay pári ya sankaben- benan toy lapis tan nilukot iran papipapil, sikatotay sankaabigan a sumusulat ed palapágan tan pinabli met a kaarok..... talagan walay ibabagá to.....matudió!"
"Siopa tan balet so melamelag a lakin amalakpak lay balbas ed aping to ey?....."
"Sikatotay angiloob ed taloran ának to, saratay iba ton panpandakan bibii ay, ed opisinay fomento ya ipapangulo to ta pian makapansueldo ra..... Sakey a Sakey a toon masilib, atagey so kasiliban to! Manggaway kalokoan to insan to ipakasalanan.....ed saray arum, mansaliw na kawes to say manbabayar say cajay gobierno. Matudión kanunotan tan masilib, ag naabot so kasiliban to!".
Tinmonday Tadeo.
"Siopa man balet so sinyor a masubesubeg so itsura ton ag mangitaltalek so kanenengneng ton singa tora ososdongan ya ami totoo ay ey?" kuay tepet nen kasulsulming ya estudiante ya inturo toy sakey a lakín say kagagalaw na uló to et singa mamaong a nagnagnap.
Ag balet naebatan nen Tadeo ta ngalngalin naputer so beklew tod panangitangolaw ton pannenengneng ed kinen Paulita Gomez ya nitanlan kaolop toy sakey ya amiga to, si Donya Victorina tan si Juanito Pelaez. Saya, nirigaloan to ray sakey a palko tan lalo lamet a pinmalaloy inkabukot to.
