Atanga ran amin lawari mandengdengel ta apasal lan da lantí so tonggal daiset a panangapiger.
"Singa panangiplano ray amerikano!" kuanen Ben Zayb ta pian naala toy maong a linawa nen Simoun, ta saya abayag a nanayam ed America del Norte (Estados Unidos)."
Marakerakep dan amin iman a kanunotan tan ontay impatnag da ed galagalaw na uló ra. Bukor nen Don Custodio labat, si Don Custodio laingen a nasasalitan malokak a panagnunot, nisesengeg lági ed mankanawnawan kipapasen to tan atagey iran bebenbenan ton betang, so inisip ton kanepegan ton sumlangen iman a kanunotan ya ag nanlapod sikato..... singa asalín so aliling to!....kanian inmokok, pinirles to ray sampot na bigote to, tan diad bosis ton makabaliksan a singa bilang peles na supiatan ed Ayuntamiento, inkuanto:
"Itepel yoak pa sinyor Simoun, kagalgalang kon kaaro, no onkasipa ak ed panagnunot yo; masiadoy karakel na nagastos tan nayarin naderal so dakdakel a báley."
- "Deralen ira!" ebat nen Simoun ya amagamagá.
- "Sa balet so pilak ya ibayar ed saray mankimey cy..
- "Ag ira bayaran. Saray periso tan saray atutolan...."
- "Ka! Ag ira onsapot, Sr. Simoun!"
"No ag ira onsapot pankimeyen iray amin ya ombáley, saray mamásiken, saray tubonbalo, saray ugugaw; say naugalíyan a labinlimay agew a kanepegan dan pankimey ya onkanad Uley, inatnat a taló, apat, ono limay bulan tan ipanod saya sa akauley iran manbálon tan manawit na ikana ran kagawaan!"
Nisegawan si Don Custodio tan linmingaw ed bick tan biek ta ompano walay wadman ya indio ya makangel. Kapalpalaran ta saramay wadman et taga uma ra labat, tan saramay duaran mangeegnay timon et walan amin so imano ra ed bakbakuer ton may ilog.
"Balet ta, sinyor Simoun....."
"Agyo la lolokoey inkasikayon díli, Don Custodio," kuanen Simoun ya amagamagá; "sikatoyay alenleneg a pakagaway ankabaleg iran kimey ono ipapaálagey no makisir so gastosen.
________________________
1 City Hall natan.
