Ag akagalaw si abogado cd kawalaan to, ya nengneng toy nikelawan. Dengdenglen to ray kurang a manarawi, inyurong ton impawil, tan kuanton inmeremeré:
"Kasi met la man a tubonbalo ay! Mikalubayan met iran kanunotan so dinmadalan cd kaisipan ko nen saman! Siopa ta met sirin so ag malabay a makapangibagay ginawak yan kaabigan cd báley kon nianakan, intalagak so bilay kod kaabigan day arum .....! Balanget na laurel ya angesep na kapaitan, bulobulong iran amagaan ya anakbong ed sabisabit tan bigibigis! Aliwan sikato tay bilay, ag itan makapangiter na panbilay tan agmet makaiter na kagalangan; saray bulobulong na laurel maong labat no onkana ran gaween a sawsawan a pangekal na singla,....agmet ira makapangiter na deey bilay.....ni makaiba ra ed pananaloy kulkol.....makasbel nira ingen! Kapag sakey a bansa walay totuntonen ton maptek a panagnunot tan kagagawa ya singa dilin klima tan sakisakit to ra ya dumá ra ed klima tan sakisakit ira ed arum iran bansá!"
Insan to impatumbok so onia:
"Kasi met lan tubonbalo!.....No amin a too komon et mannunot tan mankimey a singa sikato, nayari pa lagi..... Pangaskasiyan met lan tubonbalo! Kási met lay Florentino!"
