Uley.Sisia yoak kari; say talagan labay toy manaral, makaaral!"
"Pigara balet ed saray malabay a manaral so akasabid singa asabi yo ey? Maong no walay sakey ed samploy libo, ni satan!"
"Psch! Antoy pankaukolan yoy dakel cy?" kuay ebat nen masiken a sinintak toray abalá to; "Masulok laray abogado ya onloloob laran eskribiente labat so arum. Médiko bilang? Diad gaway karakel da manpapasakitan lara, manpapaugesan irá, tan manpapateyan larad pansasamsaman dad sakey ya agmakayari..... Saray taklay so nakaukolan, saray taklay ya manpabonay dálin, mamabolaslas na tamtanaman!"
Atalusan nen Isagani ya mandadarak labat na panaon, balet ta labay to nin siansiay onebat.
"Ag panduaruwaan," kuanto "ya dakel laray ntédiko tan abogado, balet ta agko met nibagan nasusulokan lara ta la ray báley ya anggapoy ni abogado ni médiko ra, et yan ni bilang a dakel irad bilang, kulang nira no sukaten ed kaabigan da. Tan manlapod ag lan lamang ira nasebelay tubonbalo ya manaral, insan anggapo met la diay arum a naaral, akin et paulian iran dardaraken a sabongen so panaon da tan saray sagsagpot da ey? Tan no say inkasálay panagbangat et agto met nabaat so dakdakel a manabogado tan manmédiko, siansia lan manabogado tan manmédiko ra, ag kasi lalon abig no ompaway iran maong? Insan yanko ni ya labay yan pan. maliwen a bansa ya bansá lambengat na tomatálon tan komikimey na ambelat tan erepen diay amin a kimey na nunot, anggapoy nanengneng kon kaugsan ed pakalaem dad kakabatan irayan tomatálon tan komikimey, pangibangat ed sikara na nayarin ibangat a pangigapoan da, ya nayarian dan panoan naani no bilang malubay so pankanawnawa ra, ta pian naapiger daray kimey da tan natalusan da met iray bengabengat laran agda natan nagawat a natebek." "Bah! bah! bah!" kuanen abogado ya ilikewlikew toy lima tod dagem ed pilalek to bilang a pangabol na sarayan kaisipan; "say maong a tomatálon agto nakaukolan so mararakep iran pananalita; kugip, alablabas a pilalek, atagey iran tekiab a kanunotan! Labayon tumbokey bilin ko?"
