"Nitan ay," kuanen Isagani.
Inyan nen sinyor Pastay salming to, nanbasay pigaran papil, tan nen sankanengneng ton manaalagar si Isagani, inkuanton singa ataatá:
"Anto ta may labay kon ibaga.....say labay kon ibaga..... nakal laingen ed ulok no antoman, ta bengatbengat yo met lanti sinalábat.....anggapo met ingey unong a kabaliksan to.....no amta yo labat so youlok.....ontan lay karakel na gawak!"
Atalusan nen Isagani ya labay to lan ibáki.
"No ontan sirin," kuanton inmalagcy, "sikami....."
"Ah!..... mas maong no paulian yo lay Uley ed labay ton gaween.....Kuan yo ta si Vice Rector onsusumlang ed panbangat na salitay kastila. Anganko aliwa met a petepeteg ya agto labay no agta say kidádalan to labat. Kuanda ta say onsabin balon Rector walay awiton plano ya pangoman na onkukurang a panagbangat.....manalagar kayoy daiset.....agkayo maganat ta walan siansiay nagawaan, natan yapasakey yoy nunot yod panaral yo ta manasingger lay eksamen, insan sake ni, maong ki met lan mansalitay kastila, labay yo ni nagonigon? Antoy panpipilitan yon nibangat so salitay kastila a? Anggapoy duaruwak a nanparay panagnunot ni nen pári Florentino! Ibanoan yoak ed sikara....."
"Di pangamacn ko," kuanen Isagani, "lawas ibibilin dad siak ya nunoten koray arum unong na panagnunot kod inkasiak a díli.....agak dia linman nisesengeg ed siak, linmaak dia ya innunot kod kaabigan daran may lalon makapoy ni kipapasen da....."
"Anto lay kabaglan! Gaween day singa sikayo a, manaral met iran anggad ag nasílam so kirep da tan anggad ag ira naduldol a singa siak ed impanpapatlep koy andurukey..... Tan say pakaisip ko so no makasalita kayoy kastila, say makasengeg inaral yo, ta aliwa kayo met a taga Ibale tan aliwa met iran kakastilay ateng yo! No ontan sirin manaral ira met a singa impanaral yo, tan aligen day ginawak..... Siak impaugaw ak ed saray papári....managtunaw ak na soklati ra..... tan legay limak a kawanan a mankikiwal na batidor, sankabenbenan kod kawigi gramátika, tan panangasi Dios akaaral ak met ya agko akaukolay ni maestro, ni eskuilaan, ni abuloy na
