"Tan anganggaan day kanunotan labat so manlalapod tagey! kuay sakey a manaaral met ya insalangat; "singa bilang say "Escuela de Artes y Oficios!"¹
"Mankalna kayo, sinyores," kuanen Sandoval, "siak aliwaak a gampid saray papári, sikakabat kayon peteg ed panagnunot ko ran malalang balet ta kanepegan ya iter tayo ed César so nabebetangay César.2 Nipaakar ed satay "Escuela de Artes y Oficios" ya sakey ak ed saray sankaliketan a mangitatalikarkar tan ilúgay koy kituloy ton kiletneg a singa ompelnak a liwawa ed sarayan mapalar a kapoloan, satan ya "Escuela de Artes y Oficios" kinargo ray papári. . . .
"Ono samay asoy managtanaman ta kapara to lan lamang," kuanen Pekson a sinmalabat lamet.
"Agay lan p....!" kuanen Sandoval a mapalaloy petang na uló to ed inkabaat na balibalin pansasalita to, tan abalangan ton pati ibabaga to; "anggad anggapoy amta tayon petepeteg ya agawan mauges, ag manepeg so ag manilalo, makapoy so onkulang ed katonungan a panginapan tayoy pankanawnawa tan kawayangan na Uley.....
Insan to dia impatumbok ed marakerakep tan masamsamit iran salita so panangiansakit ed Uley tan dayew tod mabábig iran kanunotan tonia, ya saya ag nanmatalkan nen Pekson a binaat.
"Say uley na kastila," kuay arum ed saray imbábaga to, "impagamor tod sikayon amin, anggapoy insunggay to. Kinmurang ed España so uley ya walad limay saksakey a too tan ontan met so agawa dia; saray papári pinanatan day España na saray konbinto ra, saray konbinto ra dia pinanó ra met so kakatloy Ibale; diad España manouley so garrote,3 tan dia sikato met so ipapasen a sankabelatan a dusá; katóliko kami, tan impankatoliko mi kayo met; maparapit kamid panaral na aralem iran kakabatan unong ed bangat ira nen Aristóteles tan Santo Tomas, tan ontan met ya ibabangat irayan kakabatan ed saray orongan yo ra; kabalik san to nia sirin, sinyores, so onnangis kami no onnangis kayo, manlikna kami no manlikna kayo, aparpara ray pasen a panangigalangan tayo ed Dios, andi nandudumaay panagokuman tayo, nanpapara met iray dusan ipapaakseb dan dua, tan manepeg met sirin ya ipagamor mid sika-
________________
- 1 School of Arts and Trades.
- 2 Say labay ton ibaga nia so iter ed sinansakey so nabebetangan to.
- 3 Panamatey a lipitay beklew na atutolan.
