"Sankamakapalpalekan la tan! Ya, anto bilang so akibibiangay galang tan katagiay súri Inan Bansá cd totuntonen irad maptek a panagsalitay kastila ey?"
"Walaray Mangakabat na Ina tin Santa Iglisia ya makapangipaliwawa.....Amtak pa lagi? Nayarin mapaga ra ya no natalusan tayo ray onkukurang a ganggan et tuloken tayo ra..... Anto la kasi kiratngay Pilipinas no nasabisabi agew a makapantatalusan itayo?"
Ag napapaknaan nen Sandoval so aarapey tungtongan a singa nipapasen a galaw, ta no onman anggapoy napangipasngatan toy bengat lan marakep a diskurson walay kakanaan to.
"Agyo kari ipapasen a lurey so amin a nagagawa," kuanto. "Makabaliksan iran ami sasalitaen."
"Ipaarawi Dios a manlurey ak no wala ray papárin akalaok!"
"Balet ta, anto lanti napangikukoan da.....?"
"Manlapod kapilitan a lábi so panklasi," kuanen Pekson a intuloy ed saman lan lamang so tanol na bosis ton singa labat mangidadalatdat na bengat lan kabat lan gendat, "nayarian dan ibagan makasbel so kaderal na gálang, ugáli tan bilay day tubonbalo ya singa agawad eskuilaan ed Malolos....."
"Baraan! Akin saray klasi ed eskuilaan ya panbabangatay dibujo, saray nobinas, saray libot, aliwan lábi panggagawa sirin?"
"Sakey a katotonganga ed katageyay galang na Universidad," kuanen mataba ya intuloy ya agto inasikasoy imbaga nen Sandoval.
"Katotongangan Anggano ni! Say Universidad kanepegan toy ontulok ed nakaukolan day manaaral. Tan no sikato tay ibaga ra, anto siri kabaliksay Universidad ey? Sakey sirin a inletneg a togiop a mansebel ed pakaaral? Nantetekep ira sirin a mantotulongan so pigaran katao ya konwarin mangibuyak na kakabatan anta say gagala ra et say pansebel day pa. kaaral day arum?"
"Sa lanti nagagawa ta bengat lan pamaakaran a lapod leksab et tampol a nipasen ya ag pakapapaknay kipapasen....."
