"Andi siak migagalaw, a, andi siak migagalaw!" Balet ta no say nakena et samay bigaon kawalaay tagilako to, samsamban agla ompawil, ya ag mankakapet so ayew tan samba to; saramay ugugaw cd satan lalon lorlouren dan papetangey uló to, tan no mandongap lan naupot lan ami ayew to, insan naknaksel met la ray hopia tan bukel na pakuan ya inasinan, bayaran da met lan lamang ya anggapoy kulang so ami-amin a kinan da, tan si intsik ed satan onla met lan malikeliket, manelelek a kinkindatan to ra, ya ipapasen ton karinyo da lad sikato ran may manaaral so pangipekpekpek dan makalna ran may baston ed beneg to ya panamasipot dad sikato bilang.
"Huaya, homia!"
Say tanol na piano ya aakompanyaay violin, gitara tan akordeon misalsalet ed pantatankiyay baston day manaaral na arnis. Dimad andukey tan malapar a lamisaan wadman iran mansusulat so manaaral ed Ateneo ya manggagawa ray komposision da, mankokuenta ra, ya kaabay da ray mansusulat ed saray kaaroan da ed papil iran rosa ya nandidibujoy balibáli; wala met lad tay sakey a manggagaway melodrama ono sarsuila ed abay met na sakey a manaaral na flauta ya singa la laingen onpapaniring a nangingisiwan la may melodraman isusulat ni labat. Dimad aragdawi daiset, saramay babalolaki ya mankakarrera lara ya akamidias iray sutla tan akasapatilya ray binordaan, panpapalabasan day oras so pansusuplon dad saramay ugugaw ni ya agda ra tondaan a lampiniten, ya amalanga la kalamor iray layag da ed ontan lan kabibintol da; say duara ono talora ed sikara sankabenbenan dan pupugeran so sakey ya ugaw met a lakin manéyag, manakis tan mankonsil ta susutsoten dan pilit so koldoy kalson to ya labosan dan pilit..... ya ipawil ed itsura to nen inanak.....ya mandepak tan manakis. Diad sakey a silir akayurong so apatira ed liber na sakey a lamisaan a melag a mansusugal na revesino ya mansusutilan iran manelek ed baleg a ingungot na sakey a konkonwarin manaaral anta no tungtongey tua et manaalagar na pakasubó ton misugal. Nitan lan linmoob so sakey ya ontan lay panangipatnag toy kelaw tod pansusugal da ya singa makanenengneng na makapakasalanan, tan sinmingger dimad lamisaan.
