Balibalin pasiaren a nengnengen so abong a panaayaman nen Makaraig.
Baleg, maalindaway, duaran pisoy silongan to ya nirijasay mararakep iran balatyang so dorongawan, aliling toy colegio no masakbay niran oras na kabuasan, tan sakey a pasen ya andi pandenglan ed tanol tan guló ya manlapo lad a las dies ono manuotiagew la. Diad oras iran panaayayam day mankakasero, manlapo lad katubong ed pintó ed silongan ya angga lad tagey, elek lay narerengel, mapalalon sayaksak, tan guló. Tubonbalo ran akakawes na kawes ed abong manggagalaw iray sipa' ono manejercicio ra ya bitinbitin ed tagikaw iran balatyang; dimad maawaawang a takayan manaarnis iray walora ono siamira ya akaarmas iray baston, pika, gancho tan kalot, balet ta anggapo met so nasásakitan ed sikara, ta say dadapoan a pupoktalay pekpekpek da diad beneg na sakey a intsik a wadmad takayan a manlalakoy nambabangil a kakanen tan hopia ya ambelat ed eges. Sayan intsik aliktob na ugugaw ya walala rad tay mangguguyor na buck ton nilapir ya abosbos la, wala met la rad tay maninkat na hopia; tawal la ran tawal na tagilako to, tan amin lad tan a nambabangil a nanunotan dan pansutil ed sikato. Samay intsik kalamor maningal, manaye-ayew na bákil ed amin ya amta ton salita, ya pati salita ton díli, inangis to, yelek to, mikási, onimis, no anggapoy naala tod isibangot to, et agda tondaan a siansia.
"Ah, mauges saman..... Anggapo kosiesia.....Aliwa kilistiano.... Sikayo.... limonio.... Salamaje...."
Piff, paff! Pagpaulian to la kalamor. Makakaimis ya onlingaw, dapot beneg to labat so nakena, andibáli la, aánosan ton siansiay manlako ya singa anggapo lay nagagawa, no maminsan makaingal labat lan ikuantoy:
__________________
1 Bólan babuyan Saray manggagalaw akaalagey iran akaliber ed inggulis a malimpek insan da sipasipaey bólan ipaarap ed sakey tan sakey.
