"Mapatpatnag so inkasugarol yo!" kuanto; "kabkabuasan ni mansusugal kila! Nengnengen ko pa, nengnengen ko pa! Ambágel! Say ibantak mo satay talon espada!"
Insanto inkapot so awiten libro tan inyurong to met a misugal.
Kasalilikna ingal a baleg tan sankarengel so mandakmeg. Nankulkol manayay duarad man ed biek a silir, sakey ya estudiantin piley ya antiktikey so koldon to, tan sakey a kasabisabi to kalamor ya nanlapod lúyag. Saya ta kagapogapó to nin manaaral, babasaen tod maksil a bosis so leksion tod Filosofia, tan aliway impakapangibalikas toy.....Cogito, ergo sum!¹ Kangel nen piley mamapasnok ta isip to papangaranan da, akibibiang iray arum ya konwarin mamepegley anta no tungtongey tua mansusugsog ira, kanian asumpalan toy ponitian a baleg.
Diman ed pananganan wadmay sakey met a tubonbalo ya kasabisabi ton nanlapod báley to tan papasouten to ra may kakaaro ton pakaney nilukasan ton latay sardinas tan sakey botelyan alak tan rum nin awiawito ran kakanen, a saraya konwarin papapaspasout ira anta labalabay da met. Saray arum manaames irad man ed batalán a bató, tan manggagalaw iran aaligen da ray manangerep na poul a mansisiboan iray danum ya aasolen dad man ed bobon, ed baleg a liket tan elek da ray manbabantay.
Saya balet a tanol tan sayaksak tinmondan nankalkalna nen nitan laran sinmabi babaingan da ran estudiante ya tinawag ira nen Makaraig a pangisalaysay tod sikara no antolay asumpalay pankekerew day pangiletneg na eskuilaan a panbangatay salitay kastila. Inlúgay dan maararoy Isagani tan ontan met nen kastilan Sandóval a saya linma diad Ibalen nanlapod España ya mankimey ed gobierno tan ibabansag to met lan susumpalen so aral to, tan akigampin aminpinsan ed saray pilalek day estudianten pilipino. Saray inletneg na polítika ya manisiyan ed saray totoon nanduruman polí, naandi ra ed loob na oro. ngan a singara bilang natunaw ed petang na kakabatan tan kalangueran.
__________________
1 Salitay latin ya say labay ton ibaga "Mannenunot ak kanian walaak sirin, ona mabilay ak sirin." Say panangibagay piley ed salitay kastila "cojo" odino "cojito" no ugaw, kanian mamapasnok s. piley ta isip to papangaranan da.
