"Akasulong ed gamet to ya anganko nen pirmaan to ray tutol ya angipaakseb na patey legay impanuley ton Dictador,"1 kuanen Kapitan Basilio ya pinniesiaw so lupa to ed inkatenieg na liknaan to.
Tan inala ton kinonineng a maong a sasalien ton talusan imay akataták balet ta anggaman pinopulingiti to ta agto met lanti amtay manbasa tan mangipatalus na sulsulat tan sinyal iran karaanan, anggapoy abasa to.
"Agay lay kabaleg na gamet nen Sila!" kuay alenleneg a nibaga to, "ontubong so duaran gamet tayo. Kuanko la lanti ta manpapasuner itayo!"
"Dakdakel ni ray arum ya alajas ko....."
"No mialaan ed saraya ay, andila, salamat," kuanen Sinang; "lablabay ko la ray balon inkagawa."
Sakey tan sakey ed saray wadman agsi pilí, walay angalay singsing, wala met lad tay reloj, locket, etc. Si Kapitana Tiká analiw na relikario ya walay lugan ton melag a bató ya tinaksing ed samay pineketan nen Katawan tin Jesucristo ed komatlon inkiparukol to; si Sinang akapilí ikaw, si Kápitan Basilio angalay kairel na reloj ya iter tod alférez, sankaparis a ikaw ya iregalo tod kúra, tan arum niran bengabengatlan nayarin iregalo; saramay boleg a taga Tiani, inontog da met so bolsa ra ta agda labay so paitilak ed saray taga San Diego.
Si Simoun mansasaliw met na alajas iran karaanan, misasalatan met, kanian saramay maisip a kainaan inaawit da rad may anggapo lay kana tod sikaran kagawaan da ran daan. "Sikayo ey, anggapoy labay yon ilako?" tinepet nen Simoun ed Anakbanwan Tales nen naimano ton saya et banbantayan ton makakaibeg so panlalakoan tan pansasalatan da. Inmebat si Anakbanwan Tales ya alaklako lan amin iray kagawaan nen anak to tan anggapo lay kabaliksan day nakdaan.
"Samay relikario nen María Clara ey?" kuanen Sinang a tinepet.
"Sian tua!" kuanto, tan kinmidiam iray matá to.
"Relikarion binobutakay brillante tan esmeralda," kuanen Sinang ed kinen alajero; "ikakana nen amigak nen saman, kasakbayay inloob ton madre."
._____________________
1 Nen inmona zan panaon, alenleneg tan sankatageyan a makauley ed saray romanos legay bakal.
