yong tan inanagan, tan diad pegley walay uloy buitre1 ya
imbangbang ed saksakey a pirason jaspe² ya nidumaduma, ed
nanlaetay duaran payak ya akabuskag, a sikatoyay parakep day
reina ed Egipto tan pakabirbiray inkareina ra.
Kanengneng nen Sinang ed saya, sinilot toy eleng to tan inkubibit ton makababalaw, tan pati si Kápitan Basilio, anggan onman lay panamabli tod amin a karaanan agto apokpokay impakabulos toy "agi!" ed inkaapay ilalo to.
"Sakey yan marakep tan mabmablin kagawaan a makapakelaw so agto inkaderal anta sakey a duan liboy taon to la."
"Psh!" kuanen Sinang a tamtampol ta piano agla natuksoy amá ton manaliw.
"Bantiwel!" kuanto nia ta singa abalnot to lay inkaapay ilalo to; "amtam pa lági no sayan kuentas so akasengeg na kurang na panagbilay tan togiop day totoo natan ed amin a kabansaan? Sikatotan angankoy impangayat nen Cleopatra³ ed kindi Cesar4 tan si Marco Antonio5..... kanian satan a kuentas nangel to ray masamsamit tan manliob iran impangidalem day panangaro ray duaran sankabayanian a mibabakal ed panaon da, satan a kuentas nangel to ray sankaabigan tan sankarakpan iran salsalita ed latin, tan awey so pilalek mon sika komoy akasulongan to!"
"Siak? Agko saliwey taloy pisos!"
"Sarag to met so duamplo, gonggong!" kuanen Kapitana Tiká, ya singa bilang amta ton amin so nipaakar ed alajas; "atagey so balitok to tan no tunawen nayarin pagawan arum iran kagawaan."
"Saya balet ay mapilit lan singsing nen Sila," kuanen Simoun ya intuloy.
"Sakey yan singsing a balitok a putel, malaplapar tan walay taták to."
___________________
1 Manok ed tagey a masebeg a manbibilay ed bangkay day totoo odino ayayep.
2 Sakey ed saray baton ankabli ya no arum saksakey a kolor no arum manmalismalis tan nandatekdatek na nambabangil met a kolor.
3 Reina ed Egipto ya nibantog ed kalimgasan to tan inasawa nen Marco Antonio,
4 Sakey ed saray sankaabigan a general romano ya asabi toy nanictador tan emperador.
5 Balitado met a maong general a romano
