Ag inmebat si Simoun: mapagpaga ya tomtumboken toy matay Anakbanwan Tales. Saya kayári ton nanlulukas tan nansusukisok ed pigaran kajon, nalmo to may relikario. Ninengneng nen Simoun a maong, nilukasan to tan inkapot ton aminpiga; anggapoy duarúa, saman imay relikario ya inkana nen María Clara nen pistay San Diego tan inter tod samay akating ed baleg a inkaplag na panangasi to.
"Apaknaan koy inkagawa to," kuanen Simoun; "pigay pangilako yo ey?"
Ginogo nen Anakbanwan Tales so uló to ya agto amtay ibaga to, ginogo to met so layag to insan ninengneng to ra may bibii.
"Inmalak saloy linawak ed satan a relikario ay," kuan lamet nen Simoun; "labay yo lay saniasus pisos. . . . . limanlasus? Odino lablabayen yon isalat ed sananey? Manpili kayoy labay yo!"
Si Anakbanwan Tales ag akasel, atangá ya sankanengneng toy Simoun, a singa panduaruan toy narerengel to.
"Limanlasus pisos?" kuanton makalkalna.
"Limanlasus," kuanen alajeron inoman a ginmanalgal so bosis to.
Si Anakbanwan Tales dinemet to may relikario tan pinigarpigar tod lima to. Pinasiay parok day alupising to tan manggiwgiw iray lima to. Nayari kasi no paaruman to? Nayarin samay relikario so mangilaban ed sikara; no napalabas to ni man a okasion agla ompawil.
Amin ira may bibii kikindatan da ya ilako to la, likor labat si Penchang a lapod paga ton dundonen da lay Julí, inkuanton singa masansantos:
"No siak labat yatol kon singa sakey a pinablin pannodnunotan..... Saray akanengneng ed kinen María Clara ed konbinto, kuanda ta makmabeng, ya ontan lay ebeng ton ngalngalin agla makasalita tan kuandan ompatey a kaolibay day sasanta.. .. Mapalaloy dayew nen pári Salví ed sikato ta sikatoy panagkonpisaran to lanti. Sikato angankoy akasengeg na angitilakan nen Julí ya lablabay to lan insalnay laman ton díli."
Agamoran toy gagála to ta akatonday Anakbanwan Tales ed impakanunot tod anak to:
