Si Simoun dia lági ed pilalek ton napanoan ni kakaayapan day wadman, kinikiwal to ra may ankablin bató na gamet to ran kayumanggin maimuimos tan impapadalan to rad dakluap to ya singa to panliliketay larakirik da, ed ikakaruskos dan mankidkidiam ya aliling day danum iran manterter a nakokolor na bunlalakaw. Say kidiam day onman lan karakel na ankablin bató tan say tagey na bili ra, singa ra aayaten ya ipupuger so amin a matá. Si Anakbanwan Tales a sinmingger met a manmíron, inlikdem to ray matá to tan inmarawi lan tampol a singa bilang pangipaliis toy sakey a mauges a kaisipan a sinmebang ed nunot to. Say onman lan kayamanan singa to lulureyey kasegsegangan to; linmad man iman at toon mangipapasirayew tan mangipapangtay kayamanan to ed díspiras nimet na inggeter ed sikaton agew ya, manlapod kakulangay kuarta tan totoon mangasin mangibad sikato, nakaukolan toy yakseb ya itaynan ed abong ton impaalagey toy dildili to ran lima.
"Sarayay duaran brilyantin andeket nibilang irad saray sankabalgan ed mundo," kuanen alajiro ya mangipapaliwawa, "sankairapan met iran tábasen ta sankaawetan ira ed amin day brilyanti..... Sayay baton rosan mayangyangyang so kolor to, brilyanti met, tan ontan met yay malaboyong ay, anggaman da kel so makababálon esmeralda. Si intsik Quiroga sasaliwen to lad siak na anem a liboy pisos ta iregalo to kono ed sakey a biin baleg a pakayari.....ya aliwa nimet a saray brilyantin malaboyong so sankablian no ag sarayay inanagan ay."
Insanto inbiig so taloran bató ya aliwan sikaray ankakabaleg, balet ta makakapal tan balibali inkatabas da ya singa mala inanágan so kolor da.
"Anggaman ankegkekelag ira nen sayay malabóyong ay," kuanton intuloy; "say bili ra dobli. Nengneng yo yay sankamelagan da ay — duaran quilate labat so belat to —say impanaliw ko duamplon liboy pisos tan agko ilako na onkulang ed talomplon libó. Nanbaroy ak na arawrawi nisesengeg labat ed impanaliw ko. Sayay sakey ay a nala ed minas nu Golconda,1 taloran quilate tan kapalduay belat to tan masu-
____________________
1Sakey a bansa ed Indostan a balitado nisengeg ed saray minas toy brilyanti.
