“E ku balu," nganing kitnan. “Tinanggap kung
sulat ibat kaya dapot e ke buring ibuklat uling pikakarugan kung abalu pin. Kalulung Crisostomo !”
“Sabi ra kasal ya kang Linares, nung ali bitayan de i'Kapitan Tiago. O nanung dapta'nang Maria Clara kanita?” ngana namang Victoria.
Ing metung a anak a lalaki linabas yang titikul, masalusung papunta king plasa a nung nu manibat ing kantu nang Sisa. Ya i’Basilio. Ing anak ikit ne ing bale ra, alang tau at lasak. Kaybat ning dakal a pamangutang ya mung abalu na ing i'indu na memulang ya at lalakad karing dala’ning balen. Dikii kang Crispin, alang nanu mang balita.
I’Basilio kimpit no ring kayang Iwa, piputa'na ing sakit at e pepaynawa linakad ya king balen. Pengutang ne, at ing kantang dindam na sinugat wari karing kayang balugbug. Itang kalulu pinigil na ing pamangalgal ding kayang bitis at bisa yang mulai ban pakanlung karing takde ning kayang indu.
Ing mamulang likwa'na ing plasa at miras ya king bale ning bayung alperes. Ngeni anti mo ing sadya, ating metung a bante king pasbul, at ating metung a buntuk a makadungo king awang, dapot aliwa ing Medusa/1’ metung yang dalaga. Ing alperes at ing alang kalma e la milulupa.
I’Sisa migmula neng migkanta arapa’ning bale, lalwa'ne ing bulan a mayubung makilaguma king banwang asul karetang ginintwan a lulam. Lalwa’neng Basilio dapot e ya mengangas lumapit, mekad panaya' nang mako ya ketang karinan. Lalakad yang lipat-lipat karing misusumangid panig dapot manginlag yang lumapit king kwartel.
Ing dalaga ketang awang matingid neng pakirandaman itang kanta ning mamulang, at inutus na king bante ing papanika’ne.
I’Sisa inyang akakit neng lalapit ing sundalus at dindam ne siwala, mitmung takut, milai ya, at balu ning Dyos nung makananu yang pupulai ing metung a mamulang. Tatalukya'neng Basilio, at pauli ning pigaganaka'nang mawala ya, pupulai ya naman at akalingwa'na no ring sakit ding kayang bitis.
