"Maswerti kong bina king pangaligtas yu king panaun a iti,” nganang Kapitan Basilio kang Don Filipo.
"Tutu, silaban do ring aklat yu dapot ding aliwa lalu
lang dakal a kesiran.”
Metung yang babai ing linapit king rehas at sinilip ya kilub. Ding mata na kikislap la, ing panaske na tutung payat, ing bwak na makasalbag ya’t gutgut. Ing aslag ning bulan gagawa neng panaske e karaniwan.
"Sisa . . .!” nganang Don Filipo at bigla neng inarapan i'Kapitan Basilio kabang darayu ya ing mamulang.
"E ne wari ulwan king bale na ning metung a doktor,” nganang kinutang. "Kinayap nya . . .?”
Tiniman yang malungkut i'Kapitan Basilio.
"Mitakutan ya ing Doktor a magkang pota bintanganan deng kakalugura'nang Don Crisostomo inya pepalakwa'ne. Ngeni, anti mo ing sadya, lipolipo ne naman, kakanta, teterak e ya mangulu at tutuknang ya king pulu . . .”
"Nanu-nanu ing mengapalyari king balen ibat ketang leko ra kami? Sabi ra, bayu ya kanu ing pari tamu ngeni at aliwa ne ing alperes ..."
"Panaun a makatakut iti! Ing katawan paurung a lakad,” nganang bubulung Kapitan Basilio kabang isipa’na ing miralan. "Alben yu sa, kabukasa'ning pangalako yu, ikit de ing mayul ning pisamban makabitin king kisami na ning kabud pibalebale na. I'Padre Salvi, penamdama’nang tutu itang kamatayan inya sinikap na ing anggang likwa’nang papeles. Ah! ing pilosopo Tasio mete nya naman at kitkut de king kamposantu ring isik.
"Kalulung Don Anastacio!” nganang mengisnawang saldak Don Filipo. "O ring libru na?”
"Silaban do ring kosyang, uling ita kanu ikatula na ning Dyos. Ala kung aligtas, agyang deta pang libru nang Ciceron. Ing gobernadorsilyo pepabusta’nong lubus king depat da.”
Tinahimik la ring adwa.
Ketang penandit a ita meramdam ya ing dalit na ning mamulang.
"Balu mu nung kapilan ya kasal i’Maria Clara?” kitang nang Iday kang Sinang.
