Alang ulagang mibuntun la babo ning mesa ring mangaulagang xegalu king kasal. Ding brilyanteng makislap karing kalulanan dang tersyopelong asul, ding imalan pinyang bordadu, ding seda, e no man pinsingan Maria Clara. Ing dalaga maglalawe ya, dapot e manakit at piakabasa king pahayagan a mamalitang i'lbarra mete yang melumud king kadagatan.
Alang kananunanu i'Maria Clara dindam no ring adwang gamat tinakap karing kayang mata, pinigil de, at ing metung a siwalang masaya nang Padre Damaso ngana kaya:
“Ninu aku? Ninu aku?”
I'Maria Clara linuksu ya king kayang luklukan al linawe neng ating takut.
"Tonta, mitakutan ka? E mu ku panayan, ane? Menibatan ku pa king lalawigan ban tumagun king kekang kasal.”
At linapit titiman misnang yumu, inabut ne kang Maria Clara ing kayang gamat ba’neng uman niti. I'Maria Clara, linapit anting gagalgal, kinwa ne gamat i’Padre Damaso at magalang neng dela karing kayang labi.
"Ninanu ka, Maria?” nganang kinutang ning pransiskano, meko ya ing masaya nang timan at minalili ing pamigaganaka. “Ing kekang gamat marimla ya, maputla ka . . . masakit ka, anak?”
At i’Padre Damaso inabit ne kaya i'Maria Clara king lugud a e isipan atyu kaya. Telana'no ring adwa nang gamat ning dalaga at kukutna'ne karing kayang panlalawe.
“Ala na kang pamaniwala king kekang tegawan?”
