"Akakit yo?” nganang Elias, binili ne ing bagse
king bangka. Mikit ta na keng Nochebuena, king kutkuta'ning kekong ingkung. Iligtas yu ing sarili!”
At ikayu?”
"Ing Dyos linigtas na ku karing lalung maragul a panganib.”
I’Elias leko ne ing kayang kamisa. Ing metung a balas sigata’no ring kayang gamat, at ding adwang akbung merandam la. E mengabala, inabut ne ing gamat nang Ibarra a angga kanita makakera king lapag ning bangka. Tinikdo ya at linuksu king danum at saka ne sinikad ing bangka.
Merandam la ring gulisak, at sinaguli mu linto ya king makarayung bagya ing buntuk nang Elias, ban mangisnawa, at kaybat bigla yang myuman limbug.
"Oita, karin, oita!” ngarang gugulisak ding dakal at ding balas memanyalitsit lang pasibayu king danum.
Ing palua ampon ing bangka tinaga’la kaya: ing malating bakas a maputi king danum tutuldwa’na ing kayang delanan, balang ukdu mirarayu ya king bangka nang Ibarra a darayung anti mong mebulus magdilidili. Balang ing kakawe ipalto ne ing buntuk ban mangis nawa, babarilan de ring gwardya sibil ampon ding king palua.
Ing pamitagalan mekaba. Ing kasasakya'nang Ibarra marayu ne; ing kakawe milalapit ne king pampang a marayu namung anggang limangpulu kagpa. Ding babagse mapagal na la, dapot i’Elias mapagal nya naman, pauli ning malagad nyang papalto ing kayang buntuk at balang palto ya atyu king aliwang panig, anti mong ban alili no ring tatagal kaya. Ding manganyayang bakas ning kayang pamangawe e ra na tutuldwan ing delana’ning susungab. King katatawlyan ikit de lele na ning pampang, ati’nang apulu kagpa, berilan de . . . Kaybat linabas la ring dakal a penandit ... ala nang linto pa king maratun at magdilidili nang salimpapo ning dagatan.
Kaybat ning kapitnang oras, ing metung a mamagse sasabya’na ing menakit yang bakas daya king danum, lele ning pampang, dapot ding kayabe na pipiling do ring buntuk king anyung malyaring mangabaldugan wa at anti mu rin ing ali.
