"E ka manyabe?” nganang minulit pepasibayu ning alperes a mababating na diwa.
I’Tarsilo minding ya at beba reng myuman. Ding talukab nang mata bagya na la mu makabuklat dapot ing panimanma’na matulid babo ketang lalabas a maputing biga. Durundung ya ba’nang akit pa ing aslag ning aldo, dapot ing matuling a danum ning talaga a nung nu ya migbalik-balik, lunto-lumbog, yang meging tabing a tinakap kaya king likwa’nang yatu.
Penandit pa ing milabas. Ing Musa a manenaya at manalbe mayap, ikit nang minukyat king babo ning danum ing bula ning bulubuk.
"Ah ! mau yang danum !” nganang meyli.
At ing danum tinahimik pepasibayu.
Pepalambata'na pang bagya at kaybat ing alperes sininyal ya.
Ing katawa'nang Tarsilo ala nang waga pang bye. Karing makamulagat nang mata ala nang makalto nune na mu ing maputi. King asbuk na lulwal ing danum a malabug at maki samut daya. Tityup ing marimlang angin dapot e ne kikimut a katawan. Milawayan la ring sabla, alang imik, maputla at mangalimgiman. Sininyal ya ing alperes ba’reng ikuldas king pangabiti’na at meko yang mimisip malalam. I'Donya Consolacion dimpal neng mekatapilan a ukdu karing lubas nang butit Tarsilo ing api ning kayang tabaku, dapot ing katawan e ya bitasang kinimut at mitda ing api.
"Piputa'na ing sarili na!” nganang bubulung ning metung a pulis. "Lon yu nung makananu neng pepalub pasibayu ing dila na, anti mong buri neng yakmul."
Ing metung a makasukul lalwa’na ing malilyari, gagalgal ya't mamawas. Maglalawe ya misusumangid anti mong mamulang.
Ing alperes penabili'na king direktorsilyo ing ya nang mangutang kaniting dakap a metung.
"Ginu . . . gino . . . sabyan ku ngan ing angang buri yu . . nganang daralung.
"Mayap ! Alben ku pin . . . Nanu ka lagyu . . .?”
"Andung pu, ginu!”
"Bernardo. . . Leonardo. . . Ricardo. . . Eduardo. . . Gerardo. . . isanu karen. . .?”
"Andong ginu!” nganang minulit ning luse.
