Samantala i’Tarsilo, makabitin ya, papaid ning angin ing bwak nang makaba at halus makapyak ya.
"Nung kristyanus kayu, nung atin kong pusu," nganang mekisabing mayap, "ipalbug yu na kung agad o panikwanan yung ing buntuk ku dugpa ya sana king pader ba'kung agad mate, at ing Dyos dina'na pang galal iting mayap yung dapat ... at mekad misan a aldo takman yu naman ing daraptan yung ini kaku!”
Mibalik ya ing alperes at yang memuntukan king pangababa nang Tarsilo kabang tatalna'ne ing metung a orasan.
“Makakalale," nganang gugulisak Donya Consola tion kabang lalwa'neng bababa ra. "Mimingat kayu!"
Banayad deng nanabung makatwag. Migagasgas ya karing makasibi nang batu ning talaga at karing mangalaring tanaman a sisingo king buluk. Kaybat dimdam deng sinayad lalam. Ing alperes bibilanga'na ing penandit.
"Yukyat ye! nganang mabagsik minutus ning alperes.
Ing mangatalamsik nang patak ning danum king kalupa nang danum pepabalu na king ing pasakitan linto yang pasibayu king masala. Kaniting panukyat na masalusung bagya kesa kanitang panguldas na uling mebayat ya king pangabasa nang Tarsilo at miugnas yang mayan ing pabatung penimbang da kaya. Detang mengapirasung batung tinuki kaya king pangaukyat na masigla lang mebaldug king danum.
Mitmu yang burak a matuling ing kanwa’na't bwak kabang ing lupa na purus yang sugat at gasgas, ing katawa'na babad at tutulu, makanyan deng ikit ding tahimik a manalbe. King tyup ning angin mangaligkig ya king dimla.
“Bisa na kang manyabe?” ngarang kinutang.
"Ika na sang bala king kapatad kung babai!” nganang migparalampu king metung a kwadrilyero.
Nibu reng pasibayu. Akakit nang Donya Consolacion maratun pa ing danum. Ing alperes pepalabas yang metung a penandit.
Inyang inukyat deng pepasibayu i’Tarsilo angusangus nya pangisnawa at makahalehale panaske. Linawe no ring makapadurut karin at ding mata na migkule lang daya.
