"Sabyan mong sapilitan kekami ring aliwa mung kayabe,” nganang babala ning alperes kabang yasiwas ne ing yantuk.
Metung yang timan a sunu ing siniro karing labi ning dakap.
Pekisabya'neng malale ning alperes ing kura, kaybat ngana karing sundalus:
"Idala ye ketang lugal da ring mete,” nganang minutus.
King metung nang suluk ning patyu karin la makabuntun king metung a garetang luma ring limang bangke. Makatakap lang bagya king kapirasung dase marinat. Metung yang sundalus ing balik-balik magbante karing bangke at lulura mung lulura.
"Kakilala mu la?” nganang kinutang ning alperes kaybat neng biklat ing dase galut.
I'Tarsilo é ya mekibat. Ikit ne ing bangke ning asawa ning mamulang at adwa pa katau, ing king kapatad na at ing kang Lucas a makatali pa batal. Medalumdum ya ikit at metung yang pangisnawang malalam ing linwal king salu na.
"Kakilala mu la ” nganang minulit kinutang.
I’Tarsilo é ya rin bubulad.
Biglang sinyuk at ing yantuk misable ya king gulut na. Kinilig ya laman at ing lama’nang katawan minigut. Mitukituki ing barug dapot i’Tarsilo é ya rin metig.
"E ye patugutan king barug anggang é mapatad o anggang manyabi,” nganang gugulisak mwa ning alperes.
"Manyabi na ka . . . paten da ka rin,” nganing direktorsilyo.
Binalik de king sala a nung nu ya manaya ing kayabe nang merakap at disa'neng manyaus karing anggang santus, lalangitngit a ipan at kakalo tud.
"Kakilala me ine?” nganang kinutang Padre Salvi. "Ngeni ke pa ikit yan,” nganang Tarsilo at linawe neng mipnung lunus.
Timbuk ne't pildak ning alperes.
"Itali ye keng bangku!”
Ginapus de king bangkung dutung at é ro leko man ding posas nang mitmung daya. Ing parusan da miglalawe ya king makapadurut anti yang ating panintu-
