Ketang undap-undap nang sinag ning kandila mayayaninag la ring larawan tau. Lalaking makakaul karing tud da at kukubli ro kareti ding karelang buntuk, ding mapilan makakera lang makasakab, ding aliwa makatalakad la at ding aliwa naman makarap la king pader. Biglang meramdam ing barug at ing lagitik kagna’ning sumpa. Mibusni ya ing pangó.
I’Donya Consolacion maka-dangle ya batal at mangamulagat makalawe king pasbul a makabusning bagya.
Pilatan ding adwang sundalus liwal de ing kataung malumbe tutu panaske. Iti ya i'Tarsilo, ing kapatad nang Bruno. Makaposas ya. Ing imala’nang mengagabak papakit do ring mangasika’nang takde. Lalwa’ neng mipnung sama ing asawa ning alperes.
"Yan, ya ing matalik linaban at pepapulaya'no pa ring kayabe na at linaban yang dili-dili,” nganing alperes kang Padre Salvi.
King kaguluta’na liwal de ing metung a itsurang makalunus, managulele at manangis anti mong anak a malati. Titikul ya at ing pantalu’na mitmu yang daya.
"Malunus kayu, ginu, malunus kayu . . . é na ku pasibayu pang tuklu king patyu,” nganang gugulisak.
"Hampas-lupa ya yan,” nganing alperes king kura. "Tatakas ya dapot mebaril ya king babo pwad. Deng adwang den ila mung ikwa ming mabye.”
"Nanu ka lagyu?” nganang kinutang ning alperes kang Tarsilo.
"Tarsilo Alasigan!” ngana. "Naming pengaku na kekayung Don Crisostomo ba’yong luban ing kwartil?”
"I’Don Crisostomo e na ke pekisabyan kapilan man.”
"E mu lilingad ! King uli na liban yeng e mi pyadyan ing kwartil.”
“Magkamali kayu! Pete yeng barug i'tata mi at ipamali miya. Ita mu! Payntunan yo ring adwa yung kayabe.”
Ing alperes linawe neng mipamulala ing sarhento.
"Ati lu karin, ketang malalam a kulkul! Karin mi la inugse at karin la muluk ! Ngeni, malyari yu na kung paten. Ala na kong abalu kaku nanu man . . .!”
Migtahimik la’t migmulala ring sabla.
