Ing katahimikan a mipnung pamikelangan migari karing mapilan saglit. Bandang tawli i’lbarra ikwa na ring sinulung at nganang gagalgal bubulung:
"Kararatang ku pa mu, dinatang kung pupulai ban akit da ka. . . Akakit ku ing mayap ka kesa king kakung ukulan.”
I'Maria Clara anti ya mong mepipi; é gingkas nanu mang amanu at ding mata na menatili lang makababa.
I'Ibarra linawe ne i'Linares ibat lalam angga babo, pamaglalawe ing malamarine baintau inarapa’nang magdalang katawan.
"Akakit ku king ing kakung panyatang e mapapanaya,” nganang makakalale minyabi. "Maria, panupaya mu ing e ku pa pepabalu ing paglub ku ; karing aliwang aldo asalese ku keka ing sangka’ning kakung pamanugali. . . malyari ka ta pang mikit... ita bitasa.”
Deting amanu tikya'no ning metung a paglalawe kang Linares. Ing dalaga tinas no kang Ibarra ding kayang mangalagung mata, mitmung linis at lungkut, misnang pamanigapu at binang dakal a buring sabyan. I’lbarra mitan yang e na balu ing kayang daptan.
"Malyari kung datang bukas?" "Balu mu ing aku kapilan man makasadya ra kang tatanggapan,” nganang Maria Clarang ganap mung merandam.
I’lbarra meko yang lupang tahimik a itsura dapot mibabagyuan ya wari pamisip at ating e mu nanung dimla king pusu. Itang ibat na pamung ikit at penandaman, é na apitaluse: Nanu ita? Kapikakunwan, keyalan lugod, pamagpaliwas?
"Oh, king katatawlyan babai ya mu!" nganang bubulung.
King e na kamalayan, miras ya king karinan a nung nu re gagawan ing eskwela. Ing obra masulung na. Ing Mang Juan, kambe ning kayang metru ampon ing maragul nang lapis, Iwal at lungub ya busal ding dakal a magobra. Inyang akit ne i’lbarra milai yang sinagana kaya.
"Don Crisostomo,” ngana, “mayap na mu dinatang kayu rin. Ikami ngan panayan da kayu. Lon yu nung makananu la ring pader. Ati’nong maygit metung a metru king katas. Kilub ding adwang aldo maging
